सोलापूर : औसातील नाथ संस्थानचे अध्यक्ष तसेच तीर्थक्षेत्र पंढरपूर येथील विठ्ठल-रुक्मिणी मंदिर समितीचे सहअध्यक्ष गहिनीनाथ महाराज औसेकर यांना महाराष्ट्र राज्य शासनाच्या सांस्कृतिक विभागाकडून देण्यात येणारा कीर्तन समाज प्रबोधन पुरस्कार जाहीर झाला आहे. सांस्कृतिक कार्यमंत्री आशिष शेलार यांनी मुंबईत या पुरस्काराची घोषणा केली. तीन लाख रुपये रोख, मानचिन्ह, सन्मानपत्र, शाल, श्रीफळ असे या पुरस्काराचे स्वरूप आहे.
नाथ संस्थांनची पाच पिढ्यांपासूनची कीर्तनाची परंपरा आहे. सध्याचे पीठाधिपती गुरुबाबा व गहिनीनाथ महाराज औसेकर ती परंपरा पुढे नेत आहेत. तीर्थक्षेत्र पंढरपूरच्या श्री विठ्ठल रुक्मिणी मंदिर समितीच्या माध्यमातून गहिनीनाथ महाराज औसेकर हे गेल्या 18 वर्षांपासून वारकऱ्यांची, विठ्ठल भक्तांची सेवा करत आहेत.
आजवर मला असंख्य पुरस्कार प्राप्त झाले. त्या सर्वांमध्ये हा महाराष्ट्र शासनाचा जाहीर झालेला पुरस्कार अत्यंत सन्मानाचा असून मी त्याचा विनम्रपणे स्वीकार करतो. विशेष म्हणजे, सध्या औसा संस्थानचे सद्गुरू ज्ञानेश्वर महाराज औसेकर यांचा रौप्यमहोत्सवी पुण्यस्मरण सोहळा सुरू आहे. त्याकाळातच मला हा पुरस्कार जाहीर झाला, ही सद्गुरूचींच कृपा आहे, असे मी समजतो.- ह. भ. प. गहिनीनाथ महाराज औसेकर, सहअध्यक्ष, विठ्ठल-रुक्मिणी मंदिर समिती, पंढरपूर