सातारा : दै. ‘पुढारी’च्या वतीने आयोजित केलेल्या ‘गीतरामायण’ या बहारदार कार्यक्रमाची सातारकरांना प्रचंड उत्सुकता लागून राहिली आहे. या कार्यक्रमाचे नि:शुल्क प्रवेशिका वाटप धुमधडाक्यात झाल्यानंतर आज शनिवारी प्रत्यक्षात गायक व संगीतकार श्रीधर फडके यांच्या लयबद्धतेत ‘गीतरामायण’ची दिव्यानुभुती सातारकर रसिकांना अनुभवायला मिळणार आहे. रसिक या अनोख्या मैफिलीसाठी सज्ज झाले आहेत.
‘गीतरामायण’चा हा बहारदार कार्यक्रम शनिवार दि.12 एप्रिल रोजी सायंकाळी 6 वाजता सातारा जिल्हा मध्यवर्ती बँक सभागृहात होणार आहे. चंदुकाका सराफ ज्वेल्स हे या कार्यक्रमाचे प्रायोजक आहेत. गायक श्रीधर फडके गीत रामायण सादर करणार आहेत.महाकाव्य असलेल्या रामचरित्रातील एकामागून एक अशा प्रसंगांवर उत्कृष्ट रचना गदिमांनी केल्या व त्याला तितक्याच सुमधूर चाली सुधीर फडके यांनी रचल्या. हेच सादरीकरण आता सातार्यात श्रीधर फडके करणार आहेत. गीतरामायण शब्दमाळेतील 56 गीते मनाच्या विविध भावावस्थांनी ओथंबलेली काव्यफुलेच आहेत. गीत रामायाणातून राम कथा उलगडत असून राम-रावणाचे युध्द, सीतेचे अग्नीदिव्य अन् पुढे सीतेला वनवासाला सोडण्याचे मन हेलावणारे प्रसंग आपल्या प्रतिभेने गदिमांनी जिवंत केले आहेत. तसेच रामभक्त हनुमान जयंतीलाच गीतरामायणाचे सादरीकरण होणार असल्याने दुग्धशर्करा योगच साधला जाणार आहे. या पार्श्वभूमीवर गीत रामायण ऐकण्यासाठी सातारकरांबरोबरच जिल्ह्यातील रसिकजन आतुर झाले आहेत. या कार्यक्रमाला साताराकर रसिकांनी मोठ्या संख्येने उपस्थित रहावे, असे आवाहन दै. ‘पुढारी’व चंदुकाका सराफ यांच्यावतीने करण्यात आले आहे.
सातारकर रसिकांना ‘गीतरामायण’ची अविट गोडी हनुमान जयंतीदिवशीच आज चाखायला मिळणार आहे. या कार्यक्रमाच्या प्रवेशिका वाटपाला रसिकजनांचा मोठा प्रतिसाद मिळाला. प्रवेशिकांसाठी अलोट गर्दी होत होती. काही दिवसातच प्रवेशिका संपल्यामुळे अनेकांनी ‘पुढारी’कडे धाव घेवूनही आसनक्षमतेच्या मर्यादेमुळे त्यांना प्रवेशिका मिळू शकल्या नाहीत. त्यामुळे आज प्रत्यक्ष कार्यक्रमस्थळी सातारकर रसिकांची गर्दी होणार आहे. वेळेपूर्वी येणार्यांना अग्रक्रमाने प्रवेश दिला जाणार आहे. कार्यक्रम नियोजित वेळेनुसार म्हणजेच बरोबर सहा वाजता सुरू होणार आहे. त्यामुळे वेळेपूर्वी येवून आसनस्थ होण्याचे आवाहन आयोजकांनी केले आहे.
हनुमान जयंतीलाच आज गीतरामायण ऐकण्याची सातारकरांना संधी
स्वरतीर्थ श्रीधर फडके यांच्याकडून होणार सादरीकरण
मंगलमय क्षणांचा आनंद होणार द्विगुणीत
काव्य नव्हे तर एक अमृतसंचय स्वरसोहळा