परळी; पुढारी वृत्तसेवा : विकेंड अन् आखाडीची सांगता यामुळे रविवारी सातार्याच्या पश्चिमेला पर्यटकांची मांदियाळी झाली. ठोसेघर धबधबा, केळवली धबधबा, सज्जनगडावर वाहनांच्या रांगा लागल्या. ठोसेघर धबधब्यावरील पायरी मार्गावर पर्यटकांची गर्दी झाली होती.
रिमझिम पाऊस, हिरवेगार डोंगर अन् त्यातून फेसाळणारे धबधबे असं अल्हाददायक वातावरण ठोसेघर परिसरात निर्माण झाले आहेत. सातार्याच्या पश्चिमेला म्हणजेच ठोसेघर, चाळकेवाडी, सज्जनगड, केळवली, भांबवली आणि कास पठार या हिरव्यागार डोंगररांगात रविवारी दिवसभर मान्सून पर्यटकांचा जणू पाऊस वाहत होता.
ठोसेघर, सज्जनगड परिसरात वाहनांच्या दोन-दोन किलोमीटर रांगा लागल्या होत्या. सध्या मान्सून पर्यटन बहरले आहे. त्यातच शनिवार रविवारची सुट्टी आणि आखाडीची सांगता यामुळे पर्यटनासाठी सहकुटुंब तसेच मित्र परिवारांसह अनेकजण या परिसरात दाखल झाले होते. बाईक रॅली आणि चार चाकी गाड्यांची जणू रॅली निघाल्याप्रमाणे वातावरण होते.