Satara Snake Rescuer 
सातारा

Satara Snake Rescuer : घोणसला जीवदान देताना सर्पमित्राचा मृत्यू

आसरे येथील घटना : यापूर्वीही झाला होता दंश

पुढारी वृत्तसेवा

पळशी : विषारी घोणस सापाला सुरक्षित ठिकाणी सोडून त्याचे प्राण वाचवताना कोरेगावचे सर्पमित्र व प्राणिमित्र योगेश धुमाळ (वय ४८) यांचा शुक्रवारी आसरे येथे सर्पदंशाने मृत्यू झाला. या दुर्दैवी घटनेने कोरेगाव शहर व परिसरात शोककळा पसरली आहे.

मूळचे पुणे जिल्ह्यातील वीर, ता. पुरंदर येथील धुमाळ कोरेगाव येथे राहत होते. झाप्रा या प्राणिमित्र संघटनेशी जोडले जाऊन त्यांनी सर्पमित्र म्हणून काम केले होते. सर्पांसह भटके कुत्रे, मांजरी आणि संकटात सापडलेल्या अन्य प्राण्यांना मदत करण्यासाठी ते नेहमी तत्पर असत. शुक्रवारी दुपारी आसरे येथील उसाच्या शेतात घोणस साप आढळल्याची माहिती मिळताच ते घटनास्थळी पोहोचले. सापाला पकडून पोत्यात घालत असताना त्याने त्यांच्या करंगळीला दंश केला. दंशानंतरही त्यांनी सापाला सुरक्षित निर्जनस्थळी सोडले.

मात्र, विषाचा परिणाम जाणवू लागल्याने त्यांनी कोरेगाव उपजिल्हा रुग्णालयात धाव घेतली. उपचार सुरू असतानाच त्यांची प्राणज्योत मालवली. यापूर्वीही त्यांना घोणसने दंश केला होता; मात्र त्यावेळी ते उपचारांनंतर बचावले होते. त्यांच्या पश्‍चात बहीण, मेहुणे, भाचे व भाचेसून असा परिवार आहे.

लोकल ते ग्लोबल बातम्यांसाठी डाऊनलोड करा दैनिक पुढारीचे Android आणि iOS मोबाईल App.

'Pudhari' is excited to announce the relaunch of its Android and iOS apps. Stay updated with the latest news at your fingertips.

Android and iOS Download now and stay updated, anytime, anywhere.

SCROLL FOR NEXT