सातारा : सार्वजनिक वितरण व्यवस्थेंतर्गत रेशन धान्याचा लाभ घेणार्या जिल्ह्यातील २ लाख ४७ हजार ६२० ग्राहकांची ई-केवायसी रखडल्याने त्यांना धान्याला मुकावे लागणार आहे. २० सप्टेंबरपर्यंत ई-केवायसी न केल्यास संबंधित लाभार्थ्यांचे धान्य कायमचे बंद होण्याची शक्यता आहे. ई-केवायसीमध्ये फलटण तालुका पिछाडीवर असल्याचे समोर आले आहे.
सार्वजनिक वितरण व्यवस्थेंतर्गत शिधापत्रिकेतील प्रत्येक लाभार्थ्याची अचूक ओळख पटवण्यासाठी आणि पारदर्शकता आणण्यासाठी केंद्र व राज्य शासनाच्या निर्देशानुसार ई-केवायसी प्रक्रिया पूर्ण करणे बंधनकारक आहे. सातारा जिल्ह्यात ई-केवायसी न केलेल्या लाभार्थ्यांना धान्याचा लाभ मिळणार नाही. ई-केवायसी करण्यासाठी जिल्ह्यात १७ लाख ३७ हजार ४८८ लाभार्थ्यांचे उद्दिष्ट देण्यात आले होते. त्यामध्ये अकरा तालुक्यांत १४ लाख ८९ हजार ८६८ लाभार्थ्यांची ई-केवायसी पूर्ण करण्यात आली. त्याची टक्केवारी ८५.७५ इतकी आहे.
मात्र, यामध्ये अद्याप २ लाख ४७ हजार ६२० लाभार्थ्यांची ई-केवायसी झालेली नाही. ई-केवायसीमध्ये फलटण तालुका सर्वात मागे असून ८१.१ टक्के काम झाले आहे. ई-केवायसी ३० सप्टेंबरपर्यंत करायची असल्याने मुदत संपण्यासाठी फक्त आठ दिवसांचाच कालावधी राहिला आहे. ई-केवायसी प्रलंबित असलेल्या लाभार्थ्यांची संबंधित गावातील रास्त भाव धान्य दुकानदाराकडे यादी उपलब्ध करून देण्यात आली आहे. लाभार्थ्यांनी त्या-त्या रेशन धान्य दुकानदारांशी संपर्क साधणे आवश्यक आहे.
ई-केवायसी न झालेले तालुकानिहाय लाभार्थी
जावली तालुक्यात ११ हजार, कराड तालुक्यात ५० हजार २८, खंडाळा तालुक्यात ८ हजार २९२, खटाव तालुक्यात २३ हजार ६६३, कोरेगाव तालुक्यात १५ हजार ७३०, महाबळेश्वर तालुक्यात ४ हजार १७८, माण तालुक्यात २१ हजार ५१५, पाटण तालुक्यात २९ हजार ८२६, फलटण तालुक्यात ३४ हजार ३६६, सातारा तालुक्यात ३६ हजार ६४६, वाई तालुक्यात १२ हजार ३७६ अशी लाभार्थ्यांची ई-केवायसी होणे बाकी आहे.
ई-केवायसी करण्यासाठी जिल्ह्यात दि. २८ ते २९ सप्टेंबरदरम्यान जिल्ह्यातील सर्व तालुक्यांच्या ठिकाणी सेवा सेतू कॅम्पचे आयोजन करण्यात आले आहे. या शिबिरांमध्ये ई-केवायसी पूर्ण करणे, रेशन कार्डशी मोबाईल लिंक करणे, तक्रार निवारण आदी सुविधा उपलब्ध करून देण्यात आल्या आहेत. लाभार्थ्यांनी मुदतीत ई-केवायसी करून सहकार्य करावे,- वैशाली राजमाने, जिल्हा पुरवठा अधिकारी