पाटण : पाटण तालुक्यातील तामकडे गावच्या हद्दीत एका वळणावर चिपळूणच्या दिशेने निघालेले तीन माल वाहतूक करणारे ट्रक एकमेकांवर आदळले. या अपघातात कंटेनरच्या केबीनचा चक्काचूर झाल्याने चालक अडकला होता. पाटणची पोलीस यंत्रणा, स्थानिक युवक व यांत्रिकी कारागीर यांच्या मदतीने तब्बल आठ तासांच्या प्रयत्नानंतर ट्रकचे केबीन कटरच्या सहाय्याने तोडून चालकाला बाहेर काढण्यात आले. यात चालक गंभीररित्या जखमी झाला असून त्याच्यावर कराड येथील कृष्णा रुग्णालयात उपचार सुरू आहेत. या अपघाताची नोंद शुक्रवारी रात्री उशिरा पाटण पोलिसात करण्यात आली.
याबाबत पाटण पोलिसांनी दिलेली माहिती अशी, गुरूवार दि. 28 रोजी चिपळूणच्या दिशेने माल वाहतूक करणारे तीन ट्रक निघाले होते. कराड-चिपळूण राष्ट्रीय महामार्गावरील तामकडे गावच्या हद्दीत येराडनजीक हे तीन ट्रक आले असता रस्ता खराब असल्याने तसेच रस्त्याचा अंदाज न आल्याने तिन्ही ट्रक एकमेकांवर जोरदार आदळून अपघात झाला. त्यातील एका ट्रकचे केबीन पूर्णपणे उद्ध्वस्त झाल्याने त्या केबीनमध्ये मरगे साहब हा चालक अडकून पडला होता. अपघाताची माहिती स्थानिकांनी पाटण पोलिसांना दिल्यानंतर पाटणची पोलीस यंत्रणा घटनास्थळी दाखल झाली.
रात्री 11.30 पासून ते सकाळपर्यंत घटनास्थळी पोलीस निरीक्षक अविनाश कवठेकर यांच्या मार्गदर्शनाखाली पोलीस उपनिरीक्षक राजेंद्र सदगर, पीएसआय संजय राऊत, पोलीस कॉन्स्टेबल संतोष माने, शरद गुरव, उमेश मोरे, मच्छींद्र जाधव, पोलीस पाटील पाडवी हे घटनास्थळी ठाण मांडून होते. चालकाला वाचविण्याचे शर्तीचे प्रयत्न सुरू होते. पाटणचे यांत्रिक कारागीर प्रकाश सुतार व स्थानिक युवक शैलेश चव्हाण, आशिष जंगम, श्रेयस चौधरी, विशाल शिर्के यांच्या मदतीने आठ तासानंतर कटरच्या सहाय्याने केबीन तोडून चालकाला बाहेर काढण्यात यश आले.
चालकाच्या पायाला गंभीर दुखापत झाल्याने त्याच्यावर पाटण ग्रामीण रुग्णालयात प्राथमिक उपचार करून अधिक उपचारासाठी कराड येथील कृष्णा रुग्णालयात दाखल करण्यात आले आहे. या अपघातात तीनही ट्रकचे मोठे नुकसान झाले आहे. अपघाताची नोंद शुक्रवारी रात्री उशिरा पाटण पोलिसात करण्यात आली. याचा अधिक तपास पाटण पोलीस करत आहेत.