महाबळेश्वर : महाबळेश्वर तालुक्यातील मेटगुताड येथील माऊंटन ब्रीज हॉटेलमध्ये गादी आणण्यासाठी गेलेल्या कर्मचाऱ्याचा पावसामुळे ओल्या झालेल्या जिन्यावरून पाय घसरून पडल्याने मृत्यू झाला.
पांडुरंग ऊर्फ बापू कोंडिबा चव्हाण (वय ४३, रा. केळघर, ता. जावली) असे मृत्यू झालेल्या कामगाराचे नाव आहे. त्यांच्या डोक्याच्या मागील बाजूस गंभीर दुखापत झाली होती.
याबाबत अधिक माहिती अशी, मेटगुताड येथील माऊंटन ब्रीज हॉटेलमध्ये चव्हाण गेल्या काही वर्षांपासून कामगार म्हणून कार्यरत होते. सध्या वीकेंडसह सलग सुट्ट्या असल्याने हॉटेलमध्ये पर्यटकांची मोठी गर्दी होती.पावसामुळे जिन्यावर पाणी साचले होते. चव्हाण हे हॉटेलमध्ये गादी आणण्यासाठी गेले होते. या जिन्यावरून त्यांचा पाय घसरल्याने ते खाली पडले. यात त्यांच्या डोक्याच्या मागील बाजूस गंभीर दुखापत झाली.