कोरेगाव, पुढारी वृत्तसेवा : कोरेगाव मतदारसंघातील मागासवर्गीय समाजघटकांच्या विकासासाठी भारतरत्न डॉ. बाबासाहेब आंबेडकर सामाजिक विकास योजनेंतर्गत सामाजिक न्यायमंत्री ना. सुरेश खाडे यांनी 5 कोटी रूपयांचा निधी मंजूर झाला आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस व अजित पवार यांच्या माध्यमातून हा निधी उपलब्ध झाला आहे. यासाठी पालकमंत्री शंभूराज देसाई यांनी सहकार्य केले असल्याचे आ. महेश शिंदे यांनी सांगितले.
कोरेगाव तालुक्यासाठी 1 कोटी 95 लाख रुपये मंजूर झाले असून, त्यामध्ये सर्वाधिक सातारारोडसाठी 1 कोटी 10 लाख रुपयांच्या निधीचा समावेश आहे. या निधीतून गावातील प्रमुख चौकापासून ते बौध्द वस्तीकडे जाणारा रस्ता, बंदिस्त गटारे बांधली जाणार आहे. तसेच रस्ता ट्रिमिक्स व काँक्रीटीकरण व बंदिस्त गटारांसाठी एकंबे व शिरंबेसाठी प्रत्येकी 20 लाख रूपये मंजूर करण्यात आले आहे. याचबरोबर चिमणगाव, भोसे व अंबवडे संमत कोरेगाव येथील बौध्द वस्तीसाठी प्रत्येकी 15 लाख रुपये मंजूर करण्यात आले आहेत. खटाव तालुक्यासाठी 1 कोटी 20 लाख रुपये मंजूर झाले असून खटाव गावासाठी 80 लाखांचा निधी मंजूर झाला आहे. याचबरोबर बुधसाठी 30 आणि वेटणेसाठी 10 लाखांचा निधी मंजूर झाला आहे.
सातारा तालुक्यासाठी 1 कोटी 95 लाख रुपये मंजूर करण्यात आले आहे. यामध्ये संभाजीनगरमधील वॉर्ड क्रमांक 4 व 5 मधील रस्त्यांचे काँक्रीटीकरण व बंदिस्त गटारांसाठी निधी मंजूर करण्यात आला आहे. खेडसाठी 20 लाख, महागावसाठी 20 लाख रूपये मंजूर करण्यात आले आहे. या तिन्ही तालुक्यातील 14 कामांसाठी 5 कोटींचा निधी मंजूर झाला आहे. पहिल्या टप्प्यात तातडीने 30 टक्केनिधीची रक्कम म्हणून दीड कोटी रुपये वर्ग करण्यात आले आहे.