लोणंद : लोणंद बस स्थानकाजवळ भरधाव वेगातील क्रेनने दुचाकीला जोराची धडक दिली. या अपघातात महिला ठार झाल्याची घटना घडली आहे. नंदा मनोहर नलावडे (वय 60, रा. दौंड ता. पुरंदर जि. पुणे) असे अपघातात ठार झालेल्या महिलेचे नाव आहे.
लोणंद शहरातून जाणारा पुणे- सातारा या मुख्य रस्त्यावरील लोणंद बसस्थानकाजवळ शनिवार दि. 26 रोजी दुपारी 2 वाजण्याच्या सुमारास निरा बाजुकडे जाणार्या क्रेन ( क्र. एमएच 11 सी डब्लू 8290) ची दुचाकी (क्र. एमएच 12 ईई 804) ला जोराची धडक दिली. या धडकेत दुचाकीवरील नंदा नलावडे या गंभीर जखमी होऊन त्यांचा मृत्यू झाला. अपघातानंतर क्रेन चालक पळून गेला. या अपघाताची खबर रवींद्र दत्तात्रय निगडे (रा.गुळूंचे) यांनी लोणंद पोलिसात दिली. भरधाव वेगात क्रेन चालवल्या प्रकरणी क्रेन चालक विशाल परमा पटेल (वय 19, रा. बिहार) याच्यावर गुन्हा दाखल झाला आहे. पुढील तपास पोलिस हवालदार नाळे करत आहेत.