पाटण : कोयना धरणांतर्गत जलाशयात पावसाचा जोर कमी झाला आहे. धरणात प्रतिसेकंद सरासरी 33,815 क्युसेक पाण्याची आवक होत असून, पाणीसाठा 85.44 टीएमसी झाला आहे. पाण्याची आवक कमी झाल्याने सोमवारी सायंकाळी पाच वाजता धरणाचे सहा वक्री दरवाजे साडेसहा फुटांवरून चार फूट केले आहेत. धरणातून विनावापर प्रतिसेकंद 19,724 व पायथा वीजगृहातून वीजनिर्मिती करून 2,100 असे एकूण 21,824 क्युसेक पाणी पूर्वेकडे कोयना नदीपात्रात सोडण्यात आले आहे. यामुळे कोयना नदीच्या पाणीपातळीत वाढ कायम असल्याने नदीकाठची गावे व लोकवस्त्यांना प्रशासनाकडून सावधानतेचा इशारा कायम आहे.
कोयना धरण शिवसागर जलाशयात कोयना, नवजा, महाबळेश्वर या तिन्ही विभागात सध्या पाऊस पडत आहे. धरणात ज्या पटीत पाण्याची आवक होईल त्यानुसार कमी जास्त पाणी सोडण्याचा विचार असल्याची माहिती धरण व्यवस्थापनाकडून देण्यात आली आहे. रविवार संध्याकाळी पाच ते सोमवारी संध्याकाळी पाच या चोवीस तासात धरणातील पाणीसाठ्यात 2.87 टीएमसीने वाढ झाली आहे. याच चोवीस तासात झालेला पाऊस मि.मी.मध्ये पुढील प्रमाणे कोयना 49, नवजा 32, महाबळेश्वर 63. धरणात सध्या उपयुक्त पाणीसाठा 80.44 टीएमसी, पाणी उंची समुद्रसपाटीपासून 2147.3 फूट तर जलपातळी 654.482 मीटर इतकी झाली आहे.