वाई : पसरणी (ता. वाई) येथील तरुणाला कोल्हापूरमधील काही युवकांनी मंगळवारी रात्री बेदम मारहाण करून अपहरण केले होते. वाई पोलिसांच्या गुन्हे प्रकटीकरण विभागाने कोल्हापूर पोलिसांची मदत घेत अपहरण झालेल्या तरुणाची सुटका करून पाच संशयितांना अटक केली. संशयितांना वाई न्यायालयासमोर हजर केले असता दोन दिवसांची पोलिस कोठडी मिळाली आहे.
सनी रमेश भोसले (रा. उत्तेश्वर मंदिर कोल्हापूर मूळचा राहणार पसरणी ता. वाई) असे अपहरण झालेल्या तरुणाचे नाव आहे. तर गणेश विश्वास काटकर, प्रशांत प्रकाश सुर्वे, शुभम सुनील जाधव, मानसिंग विजयसिंह भोसले, अभिजित उर्फ पंप्या सर्जेराव तवंदकर (सर्व रा. उत्तेश्वर मंदिर महादेव कोल्हापूर) अशी पोलिसांनी अटक केलेल्या संशयितांची नावे आहेत.
याबाबत वाई पोलिसांनी दिलेली माहिती अशी, सनी भोसले हा लहानपणापासूनच कोल्हापुरातील लक्ष्मीपुरी भागातील उत्तरेश्वर मंदिरा शेजारी राहत आहे. त्याचे शेजारी राहणार्या विवाहित महिलेसोबत प्रेम प्रकरण चालू होते, त्यातूनच त्याने त्या महिलेला फूस लावून पसरणी येथे पळवून आणले होते. तिच्या पतीसह सात लोकांनी पसरणीत येवून त्याला बेदम मारहाण करत बरोबर आणलेल्या चार चाकी गाडीतून त्याचे अपहरण करून कोल्हापूरला नेले. अपहरण झाल्याचे वाई पोलीस ठाण्याचे पोनि जितेंद्र शहाणे यांना समजताच त्यांनी त्वरित वाई गुन्हे प्रकटीकरण विभागाच्या पथकाला शोधार्थ पाठवले. या पथकाने कोल्हापूर पोलिसांची मदत घेत अपहरण झालेल्या तरुणाची सुटका करुन संशयितांना अटक केली.
संशयितांना वाई न्यायलयात हजर केले असता न्यायालयाने त्यांना दोन दिवसांची पोलिस कोठडी सुनावली आहे. तसेच वाईतील खाजगी रुग्णालयात रमेश भोसले याच्यावर उपचार चालू आहेत. अधिक तपास वाई पोलिस करत आहेत.