कराड : अटकेतील संशयिताच्या पत्नीने थेट कराड शहर पोलिस ठाण्यात घुसून लॉकअपमध्ये जाण्याचा प्रयत्न करत महिला पोलिसावरच हल्ला केला. या प्रकरणी संबंधित महिलेवर गुन्हा नोंद करण्यात आला आहे. सोमवारी सायंकाळी हा थरारक प्रकार घडला.
पोलिस कॉन्स्टेबल सोनाली प्रताप पिसाळ यांनी दिलेल्या फिर्यादीनुसार, सोमवारी सायंकाळी एका गुन्ह्यात अटकेत असलेल्या संशयिताला लॉकअपमध्ये ठेवले होते. या दरम्यान संशयिताची पत्नी पोलिस ठाण्यात धडकली आणि माझ्या नवऱ्याला आताच सोडा, असा आरडाओरडा करीत थेट लॉकअपकडे धाव घेतली. पहाऱ्यावरील पोलिस कॉन्स्टेबल दडस व इतर पोलिसांनी तिला समजावण्याचा प्रयत्न केला. मात्र संबंधित महिलेने महिला पोलिस सोनाली पिसाळ यांना शिवीगाळ करत मारहाण केली. जखमी पिसाळ यांच्यावर कराड येथील कॉटेज हॉस्पिटलमध्ये उपचार करण्यात आले.