सातारा : आईच्या आजारपणाचे कारण सांगून मित्राकडून उसने घेतलेले 6 लाख रुपये परत न करता उलट जबरदस्तीने सोन्याची चेेन घेऊन फसवणूक केल्याप्रकरणी मित्रासह त्याच्या कुटुंबावर गुन्हा दाखल झाला आहे. यातील संशयित मित्राला पोलिसांनी अटक केली. एकूण 6 लाख 85 हजार रुपयांची फसवणूक झाली असल्याचे तक्रारीत म्हटले आहे.
मयुरेश हणमंत कणसे, हणमंतराव माधवराव कणसे, धनुजा पवार (रा. शाहूनगर, सातारा मूळ रा. पिंपरी, ता. कोरेगााव), दीप्ती भोसले (रा. मुंबई) यांच्या विरुद्ध संकेत दाजी गोरड (वय 29, रा. सातारा) यांनी तक्रार दिली आहे.
याबाबत पोलिसांनी दिलेली माहिती अशी, ही घटना नोव्हेंबर 2022 पासून फेब्रुवारी 2024 या कालावधीत घडली आहे. तक्रारदार संकेत व मयुरेश हे दोघे मित्र आहेत. मयुरेश याच्या आईची तब्येत ठीक नसल्याने त्याने संकेतकडून वेळोवेळी ऑनलाईन, रोख असे एकूण 6 लाख रुपये घेतले. याचदरम्यान मयुरेश याला पैशांची अधिक गरज असल्याने त्याने पुन्हा तक्रारदार संकेत यांच्याकडे पैसे मागितले. मात्र, संकेत यांनी पहिले दिलेली पैसे देण्यास सांगून आता पैसे नसल्याचे सांगितले. यावर मयुरेश याने उसने घेतलेले पैसे नंतर देतो, असे सांगितले. तसेच आता पैसे नसतील तर गळ्यातील सोन्याची चेेन दे, असे म्हणत मयुरेश याने इतरांच्या मदतीने संकेत यांची गळ्यातील सोन्याची चेेन हिसकावून घेतली. मित्र व त्याचे कुटुंबीय असल्याने तसेच पहिले पैसे अडकल्याने तक्रारदार संकेत याने ही बाब कोणाला सांगितली नाही.
उसने घेतलेले पैसे व सोन्याची चेेन मिळावी, यासाठी तक्रारदार संकेत यांनी मित्राकडे तगादा लावला. मात्र, पैसे देण्यास टाळाटाळ केल्याने व फसवणूक झाल्याने तक्रारदार यांनी सातारा शहर पोलिस ठाण्यात तक्रार दिली. तक्रार दाखल झाल्यानंतर पोलिसांनी संशयित मयुरेश कणसे याला अटक केली.