बामणोली : बच्चू कडू यांची प्रकृती खालावली होती. हे आंदोलन थांबवण्यासाठी मी त्यांना संपर्क साधला. मंत्री उदय सामंत यांना अमरावतीला पाठवले. त्यानंतर त्यांनी आंदोलन स्थगित केले आहे. त्यांचे मी आभार मानतो. शेतकरी अन्नदाता आहे. त्यामुळे हे सरकार त्यांच्या पाठीशी ठाम असल्याची ग्वाही उपमुख्यमंत्री एकनाथ शिंदे यांनी दिली.
ना. एकनाथ शिंदे दरे तांब या आपल्या मुळगावी मुक्कामी आहेत. त्यांनी शनिवारी माध्यमांशी संवाद साधला. बच्चू कडू यांनी आंदोलन कसे मागे घेतले? याबाबत बोलताना ना. शिंदे म्हणाले, काही दिवसांपूर्वी मंत्री संजय राठोड यांना देखील बच्चू कडू यांची भेट घेण्यासाठी पाठवले होते मात्र त्यावेळेस त्यांना यश आले नाही. मात्र पुन्हा उदय सामंत यांना देखील त्या ठिकाणी पाठवले. हे सरकार शेतकर्यांच्या कायम पाठीशी असून शेतकरी हा मायबाप आहे, त्याच्या पाठीशी उभे राहिले पाहिजे असे देखील त्यांनी यावेळी सांगितले. बच्चू कडू यांची तब्येत देखील खालावली होती. डॉक्टरांनी त्यांना अतिदक्षता विभागामध्ये अॅडमिट करण्याच्या सूचना दिल्या होत्या. यासाठी त्यांचं आंदोलन थांबवलं पाहिजे त्याकरिता मी त्यांना फोन केला होता. त्यानंतर मंत्री उदय सामंत यांच्या हस्ते लिंबू सरबत घेऊन त्यांनी आंदोलन तात्पुरते स्थगित केले आहे. त्याबद्दल मी त्यांना धन्यवाद देतो असे देखील शिंदे यांनी सांगितले.
माझ्या मुख्यमंत्री पदाच्या काळामध्ये 45 हजार कोटी रुपये शेतकर्यांसाठी विविध योजनांच्या माध्यमातून आपण अडीच वर्षांमध्ये दिलेले आहेत. त्याच योजना यापुढेही सुरू ठेवण्याचा आमचा मानस आहे. मुख्यमंत्री देवेंद्रजींच्या मार्गदर्शनाखाली देखील जास्त वेगाने आम्ही निर्णय घेतोय. राज्यांमध्ये आणि त्यामुळे शेतकरी हा महत्त्वाचा घटक आम्ही मानला आहे.
ना. एकनाथ शिंदे म्हणाले, शेतकर्यांचा कर्जमाफीचा जो विषय आहे त्यामुळे आता पंधरा दिवसांमध्ये एक समिती गठित होईल आणि समितीचा अहवाल आल्यानंतर कर्जमाफीबद्दल निर्णय घेतला जाईल. नवीन कर्ज देण्याच्या संदर्भात देखील किंवा घेतलेले कर्ज पुनर्गठन करण्यासंदर्भात देखील या ठिकाणी मुख्यमंत्र्यांच्या अध्यक्षतेखाली बैठक होऊन निर्णय घेतला जाईल.