कराड : कराड विमानतळ परिसरातील एका गावातील आजारी महिला दवाखान्यात गेल्यानंतर तिच्याशी नराधम डॉक्टरने गैरवर्तन करण्याचा प्रयत्न केल्याचा धक्कादायक प्रकार समोर आला आहे. या घृणास्पद प्रकाराची माहिती मिळाल्यानंतर शनिवारी दुपारी संतप्त ग्रामस्थांनी संबंधित नराधम डॉक्टरला बेदम चोप दिला असून, त्यास पोलिसांच्या हवाली करण्यात आले आहे. याप्रकरणी कराड शहर पोलिस ठाण्यात गुन्हा नोंद करण्यात आला आहे.
डॉ. आल्ताफ हुसेन उस्मानसा नदाफ (रा. कराड) असे पोलिसांनी ताब्यात घेतलेल्या नराधम डॉक्टरचे नाव आहे. विमानतळ परिसरातील एका गावच्या हद्दीत त्याचा दवाखाना असून, याच परिसरातील एक महिला आजारी पडली होती. त्यामुळे शुक्रवार, 21 नोव्हेंबरला ती साडेअकरा वाजण्याच्या सुमारास सासूसोबत दवाखान्यात गेली होती. त्यावेळी दवाखान्यातील पडदा ओढत तपासणीच्या बहाण्याने आणि इंजेक्शन करण्याच्या बहाण्याने डॉक्टरने संबंधित विवाहितेशी गैरवर्तन करण्याचा प्रयत्न केला. यावेळी घाबरलेल्या विवाहितेने या प्रकाराची माहिती सासूला दिली नव्हती. मात्र, माहेरी गेल्यानंतर विवाहितेने तिच्या आईला या प्रकाराची कल्पना दिली. तसेच परगावी असणाऱ्या पतीला घडलेला प्रकार सांगितला.
त्यानंतर शनिवारी दुपारी एक वाजण्याच्या सुमारास डॉक्टरांना जाब विचारण्यासाठी संबंधित विवाहितेचे नातेवाईक गेले असता, त्या ठिकाणी उपस्थित संतप्त ग्रामस्थांनी डॉक्टरला चोप दिला. यावेळी पलायन करण्याच्या प्रयत्नातील डॉक्टरला रोखून धरत विवाहितेच्या नातेवाईकांनी या घटनेची माहिती शहर पोलिसांना दिली आणि पोलिसांनी घटनास्थळी पोहोचत संशयित नराधम डॉक्टरला ताब्यात घेतले. याप्रकरणी कराड शहर पोलिस ठाण्यात गुन्हा नोंद करण्यात आला असून, पोलिस उपअधीक्षक राजश्री पाटील या तपास करत आहेत.