सातारा : अल्पवयीन मेहुणीवर दाजीनेच अत्याचार केल्याची धक्कादायक घटना घडली आहे. दाजीच्या मित्रानेही संबंधित मुलीला मोबाईलवर अश्लील फोटो टाकले नाही तर आत्महत्या करण्याची धमकी दिली होती. ते फोटो मिळाल्यानंतर त्याने दाजीलाही पाठवले होते. याबाबत सातारा तालुका पोलिस ठाण्यात गुन्हा दाखल झाला आहे. पीडित मुलगी अल्पवयीन असून दाजी व त्याच्या मित्रावर पोक्सोचा गुन्हा दाखल करण्यात आला आहे.
याबाबत पोलिसांनी दिलेली माहिती अशी, ही घटना सप्टेंबर व ऑक्टोबर 2024 मध्ये घडली आहे. पीडित मुलगी विवाहित बहिणीकडे गेली होती. त्यावेळी दाजीचा मित्र शुभम पवार हा मुलीला भेटला. मुलगी घरी एकटी असताना शुभमने तिला भेटून तिचे अश्लील फोटो मोबाईलवर पाठवण्यास सांगितले. जर तसे केले नाही तर चिठ्ठी लिहून आत्महत्या करेन, अशी धमकी दिली. या घटनेने मुलगी घाबरली व तिने तिचे अश्लील फोटो शुभम याला पाठवले.
या घटनेनंतर शुभम याने ते फोटो मित्राला म्हणजेच मुलीच्या दाजीला पाठवले. याचा गैरफायदा घेत दाजीने मुलीवर वेळोवेळी अत्याचार केला. तसेच अत्याचाराची माहिती कोणाला दिल्यास अश्लील फोटो सर्वांना पाठवेन, अशी धमकी दिली. यामुळे मुलीने अत्याचार सहन केला. तसेच धमकी देत दाजीने मुलीकडून एक चिठ्ठी जबरदस्तीने लिहून घेतली आहे. या सर्व घटनेने मुलगी घाबरली. अत्याचार सहन होत नसल्याने अखेर मुलीने सातारा तालुका पोलिस ठाण्यात धाव घेतली.