सातारा : सार्वजनिक बांधकाम मंत्री शिवेंद्रराजे भोसले यांच्या मार्गदर्शनाखाली यशस्वी वाटचाल करत असलेल्या अजिंक्यतारा सहकारी साखर कारखान्याला देश पातळीवरील साखर उद्योगाशी संलग्न असलेल्या भारतीय शुगर्स या नामांकित संस्थेचा सर्वोत्कृष्ट साखर कारखाना हा राष्ट्रीय पातळीवरील प्रथम क्रमांकाचा पुरस्कार मिळाला.
कोल्हापूर येथे झालेल्या शानदार सोहळ्यात नॅशनल फेडरेशन ऑफ को-ऑपरेटिव्ह शुगर फॅक्टरीज, नवी दिल्लीचे अध्यक्ष हर्षवर्धन पाटील यांच्या हस्ते आणि भारतीय शुगरचे अध्यक्ष विक्रमसिंह शिंदे, मुख्य कार्यकारी अधिकारी संग्रामसिंह शिंदे, रणधिर शिंदे आदि मान्यवरांच्या उपस्थित कारखान्याला गौरवण्यात आले. या पुरस्काराबद्दल मान्यवरांनी ना. शिवेंद्रराजे भोसले, कारखान्याचे चेअरमन, व्हा. चेअरमन, संचालक मंडळ यांचे विशेष अभिनंदन केले. पुरस्कार स्वीकारताना कारखान्याचे चेअरमन यशवंत साळुंखे, कार्यकारी संचालक जिवाजी मोहिते, सर्व संचालक, अधिकारी, सभासद, ऊस उत्पादक शेतकरी उपस्थित होते.
कार्यकारी संचालक जिवाजी मोहिते म्हणाले, कारखान्याने सुरुवाती पासूनच शेतकर्यांचे हित जोपासले आहे. शेतकर्यांना उसाचे पेमेंट वेळेत अदा करण्याची परंपरा राखली आहे. या बाबींचा विचार करुन भारतीय शुगर्स या नामांकित संस्थेने देश पातळीवरील प्रथम क्रमांकाचा पुरस्कार प्रदान केला आहे. कारखान्याचे मार्गदर्शक संचालक ना. शिवेंद्रराजे भोसले, कारखान्याचे चेअरमन, व्हाईस चेअरमन व सर्व संचालक मंडळ यांचे मार्गदर्शन व सहकार्यामुळे हा पुरस्कार प्राप्त झाला आहे. कारखान्याच्या कार्याची दखल घेवून कारखान्याला आजअखेर राज्य व राष्ट्रीय पातळीवरील 30 पुरस्कार मिळाले आहेत. या पुरस्कारामुळे कारखान्याच्या नावलौकिकात अधिक भर पडली असून कारखाना परिवारामध्ये आनंदाचे वातावरण आहे. या पुरस्काराबद्दल ना. शिवेंद्रराजे भोसले, सर्व पदाधिकारी व संचालक मंडळाने कारखान्याचे सर्व सभासद, बिगर सभासद, अधिकारी, कामगार-कर्मचारी, ऊस तोडणी वाहतूक कंत्राटदार व हितचिंतक यांचे अभिनंदन केले आहे.