सांगली : पुढारी वृत्तसेवा
जिल्हा परिषदेच्या आगामी निवडणुकीसाठी प्रभाग रचनेचा कच्चा आराखडा जिल्हा प्रशासनाने मुंबईत राज्य निवडणूक आयोगाकडे सादर केला. मतदारसंघातील लोकसंख्या, मतदारसंख्या आणि नकाशा याचेही सादरीकरण केले. सर्वोच्च न्यायालयाने बुधवारी तातडीने निवडणूक प्रक्रिया राबवण्याचे आदेश निवडणूक आयोगाला दिल्यानंतर आयोगाने प्रत्येक जिल्ह्यास तातडीने माहिती देण्यास सांगितले होते. त्यानुसार ही माहिती देण्यात आली आहे.
जिल्हा परिषदेसाठी नव्याने आठ मतदारसंघ वाढून 68 गट होणार आहेत. कवठेमहांकाळ आणि कडेगाव तालुके वगळता उर्वरित आठ तालुक्यात प्रत्येकी एक मतदारसंघ वाढले आहेत. त्याशिवाय पंचायत समितीचे गण 136 होणार आहेत. मतदारसंघाची प्रभाग रचना प्रसिद्ध करण्याबाबतचा कार्यक्रम निवडणूक आयोग जाहीर करणार आहे. त्यामुळे आयोगाच्या पुढील निर्णयाकडे सर्वांचे लक्ष लागले आहे. जिल्हा परिषदेसाठी लवकरच धुमशान सुरू होणार आहे. राज्यातील जिल्हा परिषदा आणि पंचायत समित्यांची प्रारूप प्रभाग रचना तपासणी राज्य निवडणूक आयोगाकडून केली जात आहे. सांगली जिल्हा परिषद प्रभाग रचनेचा आराखडा मुंबईत शुक्रवारी जिल्हा प्रशासनाच्यावतीने सादर करण्यात आला. त्यात 2017 मध्ये झालेल्या जिल्हा परिषदेच्या निवडणुकीसाठी जिल्ह्यात 60 गट होते.
जिल्ह्यातील वाढती मतदारसंख्या लक्षात घेता आठ मतदारसंघ वाढले आहेत. नव्याने प्रभाग रचनेनुसार मतदारसंघातील लोकसंख्या, मतदारसंख्या आणि नकाशा सादर करण्यात आला. यावेळी प्रारूप रचनेची तपासणी करण्यात आली. तसेच प्रारूप रचना प्रसिद्ध करण्यासह विविध तांत्रिक अडचणींवर निवडणूक विभागाच्या अधिकार्यासोबत चर्चा करण्यात आली. जिल्हा परिषदा आणि पंचायत समित्यांची प्रारूप प्रभाग रचना जिल्हाधिकारी कार्यालयस्तरावर तयार करण्यात आली आहे. आता कच्चा आराखडा तयार करण्यात आला असून पक्का आराखडाही लवकरच सादर होण्याची शक्यता आहे.