तासगाव : सावर्डे (ता. तासगाव ) येथे वीज अंगावर कोसळून एका तरुणाचा उपचारादरम्यान मृत्यू झाला. रोहित उत्तम मंडले (वय 23) असे मृत्यू झालेल्या तरुणाचे नाव आहे. घटनेची नोंद तासगाव पोलिसात झाली आहे.
शुक्रवारी सायंकाळी आकाशात ढग दाटून आले होते. ढगांचा गडगडाट सुरू होता. अशा स्थितीत रोहित हा त्याच्या घरासमोरील अंगणात उभा होता. त्याचवेळी आकाशात मोठ्या प्रमाणात विजेचा कडकडाट होऊन अंगणात उभ्या असलेल्या रोहित याच्या अंगावर वीज कोसळली. क्षणार्धात रोहित जमिनीवर कोसळला. विजेच्या धक्क्याने तो बेशुद्ध पडला.
नातेवाईकांनी व स्थानिकांनी बेशुद्धावस्थेत त्याला तासगाव येथील खासगी रुग्णालयात दाखल केले. त्याच्यावर उपचार सुरू असताना शनिवारी सकाळी सात वाजता त्याचा मृत्यू झाला. येथील ग्रामीण रुग्णालयात उत्तरीय तपासणीनंतर त्याचा मृतदेह नातेवाईकांच्या ताब्यात देण्यात आला. शनिवारी दुपारी त्याच्यावर शोकाकुल वातावरणात अंत्यसंस्कार करण्यात आले.