शिराळा : शिराळा तालुक्यात सुरू असलेल्या अतिवृष्टीने जनजीवन पूर्णपणे विस्कळीत झाले आहे. शिरशी व चांदोली अभयारण्य परिसरात मुसळधार पावसाचा जोर कायम असून अनेक ठिकाणी घरांची पडझड सुरू झाली आहे. वारणा नदीने धोक्याची पातळी गाठत पात्राबाहेर वाहण्यास सुरुवात केली असून नदीकाठची शेती पाण्याखाली गेली आहे.
शिराळा, कोकरूड, चरण व सागांव मंडल क्षेत्रातही हलक्या ते मध्यम सरी कोसळल्या. डोंगराळ भागातील मुसळधार पावसामुळे शेतांमध्ये मोठ्या प्रमाणावर पाणी साचले असून खरीप हंगामातील पेरण्या लांबणीवर पडल्या आहेत. मशागतीची कामे ठप्प झाल्याने शेतकरी चिंतेत आहेत.
तालुक्यातील ४९ पाझर तलावांतील पाणीसाठ्यात झपाट्याने वाढ झाली आहे. वाकुर्डे (बु.) पाझर तलाव शंभर टक्के भरला असून मोरणा ८५ टक्के, अंत्री (बु.) ९० टक्के, शिवणी ५३ टक्के, टाकवे ५५ टक्के, रेठरे धरण ५६ टक्के, तर कार्वे १३ टक्के भरले आहे.