कोकरुड : खिरवडे (ता. शिराळा) येथे रविवारी (दि. ४) दुपारी बिबट्याने शेळीवर अचानक हल्ला केला. शेतकऱ्यांनी प्रसंगावधान राखून आरडाओरड केल्याने बिबट्याने शेळी सोडून जंगलाच्या दिशेने धूम ठोकली. या हल्ल्यात शेळी गंभीर जखमी झाली आहे.
खिरवडे येथील शेतकरी तानाजी राघू पाटील हे रविवारी दुपारी दोनच्या सुमारास जनावरे व शेळ्या घेऊन डोंगर पठारावरील शिवची ओघळ परिसरात चारण्यासाठी गेले होते. दुपारी साडेतीन ते चारच्या दरम्यान शेळ्या चरत असताना दबा धरून बसलेल्या बिबट्याने अचानक एका शेळीवर झडप घातली. हल्ल्यात शेळी जखमी झाली.
बिबट्या शेळीला घेऊन जाण्याच्या तयारीत असतानाच तानाजी पाटील यांनी आरडाओरड केली. त्यांच्या आवाजाने परिसरातील शेतकरी सीताराम पाटील (हत्तेगाव), साहिल पाटील, बाळू मस्कर, गोरख पाटील यांच्यासह इतर शेतकरी घटनास्थळी धावून आले. सर्वांनी मोठ्याने आरडाओरड केल्याने बिबट्याने शेळी सोडून जंगलाच्या दिशेने पलायन केले.