सांगली : येथील पंचशील नगरमधील 'दिशा अपार्टमेंट'मध्ये बंद फ्लॅटचे कुलूप तोडून चोरट्याने सुमारे आठ तोळे सहा ग्रॅम वजनाचे सोन्या-चांदीचे दागिने लंपास केले. सध्याच्या बाजारभावाने या दागिन्यांची किंमत सुमारे १२ लाख रुपये होत असली तरी, पोलिस ठाण्यात त्यांची नोंद २ लाख ४ हजार रुपये दाखवण्यात आली आहे.
अपार्टमेंटमधील तिसऱ्या मजल्यावरील फ्लॅट क्र. टी-०२ मध्ये राहणाऱ्या निवृत्त ग्रंथपाल भारती मल्लेशकुमार कडाके (वय ४८) या १० ऑगस्ट रोजी दुपारी १२:३० ते ३ या कालावधीत घराला कुलूप लावून बाहेर गेल्या होत्या. हीच संधी साधून चोरट्याने फ्लॅटच्या मुख्य दरवाजाचे कुलूप तोडून आत प्रवेश केला आणि घरातील सोन्या-चांदीचे दागिने लांबवले.
यामध्ये ३ तोळे वजनाचे मंगळसूत्र, दीड तोळ्याचा नेकलेस, १४ ग्रॅम वजनाची दोन मंगळसूत्रे, अर्धा तोळा वजनाची मोहनमाळ, अर्धा तोळा वजनाची साखळी, सोन्याच्या रिंगा, टॉप्स, १ तोळा साडेतीन ग्रॅमची अंगठी, सोन्याची नाणी, बाळी आणि १० तोळे वजनाचे चांदीचे वाळे व तोडे असा मुद्देमाल चोरीस गेला आहे. याप्रकरणी भारती कडाके यांनी दिलेल्या फिर्यादीवरून संजयनगर पोलिस ठाण्यात अज्ञाताविरोधात गुन्हा दाखल करण्यात आला आहे.