कडेगाव; पुढारी वृत्तसेवा : अंबक (ता. कडेगाव) येथील अश्विनी नंदकुमार जगदाळे (वय 20) या तरुणीच्या पायाला घोणस अळीने दंश केल्याने त्यांना चिंचणी येथील रुग्णालयात उपचारासाठी दाखल करण्यात आले आहे. दरम्यान, लोकरी मावा आणि हुमणी अशा संकटातून मार्ग काढत वाटचाल करीत असलेल्या शेतकर्यांसमोर आता घोणस नावाच्या या अळीचे नवे संकट उभे राहिले आहे. त्यामुळे शेतकरी वर्गात भीतीचे वातावरण पसरले आहे.
अंबक येथील अश्विनी जगदाळे ही युवती कुटुंबासह शेतात राहण्यास आहे. रविवारी दुपारी ती घराबाहेर वाळत घातलेले कपडे आणण्यासाठी गेली होती. यावेळी घराजवळ असलेल्या गवतात घोणस नावाच्या विषारी अळीवर तिचा पाय पडला. यावेळी अश्विनीच्या तळपायाला अळीने दंश केला. अळीच्या अंगावरील काटे अश्विनी हिच्या तळपायाला टोचले.त्यानंतर वेदना असह्य झाल्याने तिला चिंचणी येथील खासगी रुग्णालयात दाखल करण्यात आले. त्यानंतर पुढील उपचारासाठी चिंचणी येथील ग्रामीण रुग्णालयात दाखल करण्यात आले आहे. अश्विनी हिच्या आईने ही आळी प्लास्टिकच्या पिशवीतून डॉक्टरांना दाखवण्यासाठी रुग्णालयात आणली होती. यामुळे ती घोणस अळी असल्याचे स्पष्ट झाले