सांगली : विवाहितेला तिच्या मुलासह सांभाळण्याचे आमिष दाखवून तिच्यावर बलात्कार केल्याचा प्रकार उघडकीस आला आहे. तिच्याशी शारीरिक संबंध ठेवतानाचे व्हिडीओ चित्रण करून, पोलिसात तक्रार दिल्यास व्हिडीओ व्हायरल करण्याची धमकी दिल्याचेही समोर आले आहे. याप्रकरणी संशयित ऋत्विक अरुण वाडकर (रा. कारंदवाडी, ता. वाळवा) याच्याविरुद्ध सांगली शहर पोलिसात गुन्हा दाखल करण्यात आला आहे.
याबाबत पोलिसांनी दिलेली माहिती अशी की, पीडिता 24 वर्षीय असून ती वाळवा तालुक्यातील एका शहरात राहत आहे. संशयित ऋत्विक याने जानेवारी 2024 पासून डिसेंबरपर्यंत ‘तुला आणि तुझ्या मुलांना सांभाळतो’ असे आमिष दाखवून विवाहितेशी जवळीक साधली. सांगलीतील कोल्हापूर रोडवरील एका लॉजवर तिच्याशी शरीरसंबंध ठेवले. यातून पीडिता गर्भवती राहिली. त्याची कल्पना तिने वाडकर याला दिली. यावर ‘तुला आमच्या घरचे लोक स्वीकारणार नाहीत’, असे सांगून तिच्याशी वाद घातला.
काही दिवसांनी 1 मे आणि 13 मे रोजी पुन्हा त्याने तिच्याशी शरीरसंबंध ठेवले. यावेळी मोबाईलमध्ये व्हिडीओ चित्रण केले. पीडितेने त्याला जाब विचारला. यावरून दोघांचा वाद झाला. त्यावेळी संशयिताने पीडितेचा मोबाईल आपटून फोडला. पोलिसात गेल्यास व्हिडीओ चित्रण व्हायरल करण्याची धमकी दिली. याप्रकरणी पीडितेने सांगली शहर पोलिस ठाण्यात फिर्याद दिली. पोलिसांनी बलात्कार व अनुसूचित जाती-जमाती अत्याचार प्रतिबंधक अधिनियमानुसार गुन्हा दाखल केला आहे.