मिरज : मूल होण्याचे औषध देण्याच्या नावाखाली दाम्पत्याची फसवणूक करून त्यांचे दागिने घेऊन पसार झालेल्या भोंदूबाबास स्थानिक गुन्हे अन्वेषण विभागाने अटक केली आहे. नागेश राजू निकम (वय 36, रा. निमनिरगाव, ता. इंदापूर, जि. पुणे) असे संशयिताचे नाव आहे. पोलिसांनी त्याच्याकडून 5 लाख 87 हजार रुपयांचा मुद्देमाल जप्त केला आहे.
मिरज तालुक्यातील एका गावात ही घटना घडली होती. या दाम्पत्याला मूलबाळ होत नव्हते. याचा फायदा घेत संशयित नागेश निकम याने त्यांना मूल होण्याचे औषध देण्याचे आमिष दाखवले. 31 ऑगस्टरोजी तो त्यांच्या घरी आला. औषध देण्यापूर्वी त्याने धार्मिक विधी करण्याचे नाटक केले. त्याने दाम्पत्याला घरातील देवघरात बसवले आणि महिलेच्या अंगावरील सर्व दागिने एका कापडात बांधून एका हंड्यात ठेवण्यास सांगितले.
त्यानंतर दाम्पत्याला 20 मिनिटे एकाच जागी बसून राहण्यास सांगितले आणि आपण मंदिरात जाऊन येतो, असे खोटे सांगून तो दागिने घेऊन पसार झाला. या घटनेनंतर दाम्पत्याने पोलिसांत तक्रार दाखल केली. स्थानिक गुन्हे अन्वेषण विभागाचे पथक या प्रकरणाचा तपास करत होते.
दरम्यान, नागेश निकम हा माधवनगर परिसरात असल्याची माहिती मिळाली. पोलिसांनी तत्काळ सापळा रचून त्याला ताब्यात घेतले. त्याच्या गाडीची तपासणी केली असता, त्यामध्ये फसवणूक झालेल्या दाम्पत्याचे फोटो आणि हंडा सापडला. पोलिसांनी त्याला अटक करून त्याच्याकडून चोरीला गेलेले दागिने, मोटार, असा एकूण 5 लाख 87 हजार रुपयांचा मुद्देमाल जप्त केला आहे.