जत शहर : जत ते सांगली मार्गावर बुरुज टाकीजवळ वयोवृद्ध सेवानिवृत्त शिक्षकाची 1.50 लाख रुपयांची फसवणूक झाल्याची घटना 26 रोजी सायंकाळी घडली आहे. या प्रकरणी जत पोलिस ठाण्यात दोन अज्ञात इसमांविरुद्ध गुन्हा दाखल करण्यात आला आहे.
फिर्यादी मारुती यशवंत कांबळे (वय 80, रा. शिवाजी पेठ, विठ्ठल मंदिराजवळ, जत, जि. सांगली) यांनी दिलेल्या तक्रारीनुसार, सायंकाळी साडेपाचच्या सुमारास ते सांगली रोडवर पायी जात असताना एक अनोळखी इसम त्यांच्याजवळ येऊन अंगावरील सोने काढून सुरक्षित ठिकाणी ठेवण्यास सांगू लागला. याच वेळी दुसरा इसम येऊन, काय झाले? अशी चौकशी करू लागला. पहिल्या इसमाने चाकूचा धाक दाखवत सोने काढण्यास भाग पाडले. घाबरलेल्या कांबळे यांनी अंगावरील सुमारे 25 ग्रॅम वजनाचे सोन्याचे दागिने - दोन अंगठ्या व एक चेन, एकूण अंदाजे 1.50 लाख रुपये किमतीचे दागिने या इसमांच्या सांगण्यानुसार कागदाच्या घडीत ठेवले. यानंतर इसमांनी हातचलाखीने दगडांनी भरलेली पुडी त्यांच्या हातात दिली व मोटरसायकलवरून पसार झाले. पुडी उघडून पाहिल्यानंतर फसवणुकीची बाब उघडकीस आली.
याप्रकरणी जत पोलिस ठाण्यात गुन्हा दाखल करण्यात आला असून या दोघा अनोळखी इसमांचा शोध सुरु आहे. परिसरातील सीसीटीव्ही फुटेज तपासले जात आहेत. जत शहरात अशा प्रकारच्या फसवणुकीच्या घटना वाढत असल्याने नागरिकांनी सावध राहण्याचे आवाहन पोलिसांनी केले आहे.