शिराळा : पुढारी वृत्तसेवा
शिराळा तालुक्यात पावसाचा जोर वाढला असून, वारणावती, चरण परिसरात अतिवृष्टी सुरू आहे. वारणा व मोरणा नदीला पूर आला आहे. वारणा नदीवरील पाच पूल पाण्याखाली गेले आहेत.गुरुवारी सकाळी आरळा-शिरूर पूल पाण्याखाली गेला. चरण ते सोंडोली व कोकरूड-शित्तूर पुलावरून वाहतूक बंद करण्यात आली आहे. तालुक्यातील मांगले-सावर्डे, मांगले -कांदे, कोकरूड-रेठरे हे पूल पाण्याखाली गेले आहेत. वाहतूक बंद करण्यात आली आहे. चांदोली धरण व अभयारण्य परिसरात अतिवृष्टी सुरू असल्याने चांदोली धरणातील विसर्ग वाढवला आहे.
मुसळधार पावसामुळे काही ठिकाणी घरांची पडझड झाली आहे. सोनवडे सावंतवाडी येथील काशीनाथ सावंत व नामदेव खोत यांच्या तसेच सोनवडे खोतवाडी येथील निवृत्ती राणे यांच्या घराच्या भिंती पडल्या. 24 जुलै रोजी चांदोली धरणातून विसर्गात वाढ केली आहे. वक्रदारातून 7216 क्युसेक व विद्युत जनित्रामधून 1658 क्युसेक असा एकूण 8874 क्युसेक विसर्ग नदीपात्रात सोडण्यात येत आहे. नदीकाठच्या लोकांना सतर्कतेचा इशारा देण्यात आला आहे.- जी. एम. पाटील, उपअभियंता, चांदोली धरण
लघु पाटबंधारे उपविभागांतर्गत शिराळा तालुक्यामध्ये एकूण 49 पाझर तलाव आहेत. या तलावातील पाणी साठवण क्षमता 236.41 दशलक्ष घनफूट इतकी असून, सद्य:स्थितीत 215.19 दशलक्ष घनफूट इतका पाणीसाठा उपलब्ध झाला आहे. तसेच 11 सिमेंट नाला बंधारे पूर्ण क्षमतेने भरले आहेत. या बंधार्‍यातील पाणी साठवण क्षमता 4.52 दशलक्ष घनफूट इतकी असून, सद्य:स्थितीत 4.52 दशलक्ष घनफूट इतका पाणीसाठा उपलब्ध झाला आहे.- प्रवीण तेली, उपविभागीय जलसंधारण अधिकारी.