सांगली : कार्वे (ता. खानापूर) येथे एका कार्यालयानजीक सुमारे 18 ते 20 इंच लांबीचा पोवळा साप आढळून आला. सुजित तुकाराम जाधव हे आपल्या शेतात काम करत असताना हा साप दिसून आल्यावर त्यांनी सर्पमित्र विठ्ठल तानाजी जाधव यांच्याशी संपर्क केला. हा दुर्मीळ पोवळा जातीचा साप असल्याचे त्यांच्या लक्षात आल्यावर त्यांनी वन विभागाशी संपर्क करून हा साप सुरक्षितरीत्या पकडून रेणावी घाटातील नैसर्गिक अधिवासात सोडून दिला.
पोवळा हा वाळ्यासारखा दिसणारा व वाळ्यापेक्षा काहीसा मोठा साप आहे. या सापाचे विष मज्जासंस्थेवर परिणाम करत असल्यामुळे चावल्यास सूज येणे, चक्कर येणे, बेशुद्ध पडणे अशी लक्षणे दिसतात. चावलेल्या भागात यातना होतात. वीस ते तीस मिनिटांनी श्वसन क्रियेत अडथळा येण्याची शक्यता असते.
मात्र, आकाराने लहान असल्याने हा साप अन्य प्राण्यांच्या भक्ष्यस्थानी पडतो. हा साप लाजाळू असतो. दगड-मातीमध्ये याचे वास्तव्य असते. महाराष्ट्रासाहित संपूर्ण भारतभर आढळतो. वन्यजीव संरक्षण कायदा अंतर्गत वन्यजिवांच्या वर्गवारीत शेड्यूल (2) मध्ये समाविष्ट आहे. हा साप दुर्मीळ होत चालला आहे.