पनवेल शहर : उलवे परिसरातील तीव्र पाणीटंचाईच्या निषेधार्थ अनंता टॉवर रहिवासी संघाच्या वतीने शुक्रवारी शिस्तबद्ध पद्धतीने हंडा मोर्चा काढण्यात आला. या मोर्चात रहिवाशांनी मोठ्या संख्येने सहभाग नोंदवला.
सकाळी १० वाजता अनंता टॉवर येथून मोर्चाची सुरुवात करण्यात आली. छत्रपती शिवाजी महाराज चौक मार्गे हा मोर्चा उन्नती सोसायटीजवळील सिडको कार्यालयावर धडकला. यावेळी महिला, पुरुष तसेच युवक-युवती मोठ्या संख्येने सहभागी झाले होते. अनेकांनी पाण्याच्या समस्येचे प्रतीक म्हणून रिकामे हंडे व बाटल्या हातात घेतल्या होत्या.
गेल्या वर्षभरापासून सुरू असलेल्या पाणीटंचाईमुळे नागरिक त्रस्त झाले असून, रोजच्या पाण्यासाठी करावी लागणारी धावपळ थांबवावी, अशी मागणी करण्यात आली. यावेळी आंदोलकांनी घोषणाबाजी करत सिडको प्रशासनाचे लक्ष वेधले. मोर्चादरम्यान शिस्त आणि शांतता राखण्यात आली होती.
नागरिकांनी एकजुटीचे दर्शन घडवत आपल्या हक्काच्या पाण्यासाठी लढा देण्याचा निर्धार व्यक्त केला. या आंदोलनामुळे सिडको प्रशासनावर दबाव निर्माण झाला असून, लवकरच ठोस उपाययोजना करण्यात याव्यात, अशी अपेक्षा रहिवाशांकडून व्यक्त केली जात आहे.