महादेव सरसंबे
रायगड: रोहा तालुक्यातील खडकी गावातील एका गावठी हातभट्टी दारूच्या अड्ड्यावर रोहा पोलिसांनी मोठी कारवाई केली आहे. उपविभागीय पोलीस अधिकारी रवींद्र दौंडकर यांच्या मार्गदर्शनाखाली पोलीस निरीक्षक मारुती पाटील आणि त्यांच्या पथकाने ही धाड टाकली. या कारवाईत दारू तयार करण्यासाठी वापरले जाणारे रसायन आणि इतर साहित्य असा एकूण ९१,२०० रुपयांचा मुद्देमाल जप्त करण्यात आला आहे.
खडकी येथे गावठी दारूची निर्मिती आणि विक्री होत असल्याची गुप्त माहिती रोहा पोलिसांना मिळाली होती. या माहितीच्या आधारे पोलिसांनी सापळा रचून ही धडक कारवाई केली. या कारवाईमुळे परिसरातील अवैध दारू विक्रेत्यांचे धाबे दणाणले आहेत.
पोलिसांनी घटनास्थळावरून मोठ्या प्रमाणात मुद्देमाल हस्तगत केला आहे, ज्यामध्ये तयार गावठी दारू: ६० लिटर (किंमत ६,००० रुपये), प्रत्येकी २० लिटर क्षमतेच्या तीन प्लॅस्टिक कॅनमध्ये, नवसागर मिश्रित रसायन: १,२०० लिटर (किंमत ८४,००० रुपये), दारू निर्मितीसाठी वापरण्यात येणारे हे रसायन सहा निळ्या रंगाच्या पिंपांमध्ये सापडले, रिकामे पिंप: ६ नग (किंमत १,२०० रुपये), एकूण मुद्देमाल: ९१,२०० रुपये. या प्रकरणी रोहा पोलीस ठाण्यात गुन्हा दाखल करण्यात आला असून, यामागे आणखी कोण सहभागी आहे याचा अधिक तपास पोलीस निरीक्षक मारुती पाटील यांच्या नेतृत्वाखालील पथक करत आहे. तालुक्यातील अवैध धंद्यांवर पोलिसांची करडी नजर असून, अशा कारवाया यापुढेही सुरूच राहणार असल्याचे संकेत पोलिसांनी दिले आहेत.