रायगड : कोकण रेल्वेच्या खेड जवळील दिवाणखवटी बोगद्याजवळ दरड कोसळल्याने या मार्गावरील रेल्वे प्रवासी वाहतूक थांबविण्यात आली आहे. खेड जवळ एक रेल्वे तर विन्हेरे रेल्वे स्थानकात गांधीधाम नागरकोईल ही गाडी थांबविण्यात आल्याची माहिती रेल्वे अधिकाऱ्यांकडून देण्यात आली आहे.
या संदर्भात रेल्वे प्रशासनाकडून देखील अधिकृतपणे याची माहिती देण्यात आली असून या बोगद्यासमोरील दरडीचा भाग काढण्यासाठी किमान दोन तासाचा कालावधी लागणार असल्याचे सांगण्यात आले आहे. दरम्यान विल्हेरे रेल्वे स्थानकावर उभे असलेल्या रेल्वेतील प्रवाशांसाठी माजी जिल्हा परिषद सदस्य निलेश ताटरे यांनी आपल्या सहकाऱ्यांसह धाव घेऊन चहापाणी व नाश्त्याची व्यवस्था केली. विन्हेरे गावातील अनेक नागरिक या ठिकाणी रेल्वे प्रवाशांच्या मदतीसाठी आल्याचेही दिसून आले.
कोकण रेल्वे मार्गावर झालेल्या या घटनेचे वृत्त समजताच महाडचे आमदार भरत गोगावले यांनी स्थानिक शिवसैनिकांना तातडीने रेल्वेतील प्रवाशांची व लहान मुलांच्या संदर्भात काळजी घेण्याचे आदेश दिल्याची माहिती शिवसेनेकडून देण्यात आली आहे.