पनवेल : प्रियकराच्या मदतीने पतीचा खून करणाऱ्या पत्नी व प्रियकराला पनवेल शहर पोलीस ठाण्यात दाखल गुन्ह्यानुसार पनवेल येथील अतिसत्र न्यायाधीश एस.सी. शिंदे यांनी आरोपी पत्नी प्रितीदेवीसिंग राठोड व प्रियकर गौरवसिंग याला जन्मठेपीची शिक्षा ठोठावली आहे.
प्रितीदेवी हिचा विवाह हरिओम यांचेशी झालेला होता. प्रितीदेवी हिचे आरोपी गौरवसिंग याचेशी प्रेमसंबंध होते. तिघेही कानपूर येथील राहणारे असून गौरवसिंह व प्रितीदेवी यांच्या प्रेमात हरिओमसिंगचा अडथळा असल्याने दोघांनी त्याचा काटा काढण्यासाठी त्यास पनवेल परिसरास नोकरी लावण्याच्या बहाण्याने रेल्वे तिकीट काढून पळस्पे परिसरात आणले होते. तेथून पळस्पे येथील मोकल चाळ, रूम नं. 6. येथे भाडयाची रूम घेवून दुपारी तिघेही रूममध्ये गेले. तिथे गौरवसिंग व प्रितीदेवी यांनी चाकूने भोसकून हरिओम याचा गळा चिरून व अनेक ठिकाणी वार करून खून केला.
शेजाऱ्यांना भांडणाचा आवाज आल्याने शेजारच्या रूममधील साक्षीदारांनी दरवाजा ठोठावला. त्यावेळी प्रितीदेवी व गौरवसिंग रक्ताने माखल्याचे दिसले. साक्षीदारांनी पनवेल शहर पोलीस ठाण्यात फोन लावून याबाबत कळविले. पोलीस तातडीने रूम नं. 6 येथे पोहोचले असता पोलिसांना मयत हरिओमसिंग जखमी व मयत अवस्थेत आढळला. आरोपीही तेथे सापडल्याने पोलिसांनी त्यांना तत्काळ अटक करून गुन्हयाचा तपास चालू केला. दोन्ही आरोपीने उलटसुलट बचाव घेत गुन्हा केल्याचे नाकारले. हरिओमसिंग यांनी आत्महत्या केली असेही त्यांनी सांगितले. प्रत्यक्ष साक्षीदार नाही असे सांगून आरोपीच्या वकीलांनी खून कोणी केला? कसा केला? खून की आत्महत्या? असे संशयाचे भूत कोर्टासमोर निर्माण करण्याचा प्रयत्न केला.
सरकारी वकील वाय.एस. भोपी यांनी आरोपीच्या अंगावरील जखमा, मयताच्या अंगावरील जखमा, वैद्यकीय अहवाल यांच्या आधारे खून असल्याचे कोर्टास पटवून दिले. घटनेच्या वेळी रूम नं. 6 मध्ये आरोपी व मयत यांच्याशिवाय इतर कोणही नव्हता अशा परिस्थितीत परिस्थितीजन्य पुरावा न्यायालयास दाखवून दिला. या वेळी दोन्ही आरोपींनी खून केले असल्याचे न्यायालयास पटवून दिले. मे. न्यायालयाने सरकारी वकिलांचा युक्तीवाद मान्य करून आरोपीस जन्मठेपेची शिक्षा ठोठावली. हा खटला सिध्द करण्यासाठी तपासिक अंमलदार भिंगारदिवे, तायडे, सरिता मुसळे, कोर्ट ऑर्डर्ली चव्हाण व रसिका राठोड यांचे महत्वाचे योगदान लाभले.