पावसाळ्यात बंद असलेला मुरूडचा प्रसिद्ध जंजिरा जलदुर्ग रविवार ६ ऑक्टोबर पासून पर्यटकांना पाहण्यासाठी खुला करण्यात येत असल्याची माहिती मुरूड अलिबाग पुरातत्व विभागाचे अधिकारी बजरंग येलीकर यांनी शनिवारी (दि.5) सकाळी बोलताना दिली.
पावसाळ्यात जून पासून तीन महिने जंजिरा पर्यटकांना पाहण्यासाठी बंद ठेवण्यात येतो. परंतु यंदा वादळी हवामान, मजुरांची कमतरता अशा अनेक अडचणी आल्याने जलदुर्गाची आतील स्वच्छता सप्टेंबर महिन्यात उशिरा सुरू झाल्याने कुलूपबंद जंजिरा सुरू करण्याबाबत दिवस पुढे ढकलले जात होते. त्या मुळे पर्यटकांनी मुरूड कडे पाठ फिरवल्याचे ठिकठिकाणी दिसून येत होते. शिवाय पर्यटन व्यवसाय ठप्प असल्याचे दिसून येत होते. जंजिरा सुरू करावा अशी सातत्याने मागणी होताना दिसत होती. जंजिऱ्या चे एकूण क्षेत्र २२ एकर असून क्षेत्राची स्वच्छता कमी वेळात होणे अवघड असते. किल्यात पर्यटकांचा अधिक वावर असणारे महत्वाचे मार्ग, रॅम्पस, आदी महत्वाची ठिकाणी एवढ्या मोठ्या प्रमाणात असणाऱ्या स्वच्छता पूर्ण झाल्याने अखेर जंजिरा रविवार पासून पर्यटकांना पाहण्यासाठी खुला करण्यात येत असल्याचे बजरंग येलीकर यांनी सांगितले
पर्यटन क्षेत्र असणाऱ्या मुरूड तालुक्यात उत्तम समुद्रकिनारे, ऐतिहासिक आणि धार्मिक स्थळे असुन पाहण्याजोगी स्थळे भरपूर आहे. तरीही जंजिरा जलदुर्गाचे पर्यटकांतून आकर्षण आगळेच आहे, असे पर्यटन व्यावसायिक आणि पर्यटकांतुन नेहमीच ऐकायला मिळते. जंजिरा बंद असेल तर येथील पर्यटन रोडावते. जंजिरा पाहण्यासाठी महाराष्ट्राच्या महारा काना कोपऱ्यातुन पर्यटक येत असतात. दिवसेगणीक ही संख्या वाढती आहे. जंजिरा सुरू होत असल्याने ठप्प झालेल्या पर्यटन व्यवसायाला उर्जितावस्थेचा बहर येईल असे दिसून येत आहे. त्यामुळे यंदा दिवाळीच्या वेळी काशीद, नांदगाव, मुरूड येथील प्रसिद्ध समुद्रकिनारे फुलून जातील अशी माहिती पर्यटन क्षेत्रातील अनुभवी मंडळींनी शनिवारी बोलताना दिली आहे. दसऱ्या पासूनच पर्यटकांची वर्दळ सुरू होईल असे ठिकठिकाणी ऐकायला मिळत आहे.