पोलादपूर : तालुक्यातील कापडे गावाच्या हद्दीत अवैधरित्या गुरांची वाहतूक होत असल्याची माहिती मिळाल्यानंतर गोरक्षकांनी तत्पर कारवाई करत एक पिकअप वाहन अडवले. या कारवाईत चार गुरांसह संबंधित वाहन पोलादपूर पोलिसांच्या ताब्यात देण्यात आले.
मिळालेल्या माहितीनुसार, रायगड जिल्ह्यातील रोहा तालुक्यातून चार गुरे घेऊन जाणारी MH 13 CE 1976 क्रमांकाची पिकअप गाडी कापडे गावाच्या हद्दीतून जात होती. गुरांची अवैध वाहतूक होत असल्याची माहिती गोरक्षकांना मिळाल्यानंतर त्यांनी घटनास्थळी धाव घेत वाहनाची तपासणी केली. तपासणीदरम्यान वाहनामध्ये चार गुरे आढळून आली.यानंतर गोरक्षकांनी संबंधित वाहन व गुरे पोलादपूर पोलीस ठाण्यात जमा केली. या प्रकरणी पोलिसांनी पुढील चौकशी सुरू केली असून, गुरांच्या वाहतुकीसंदर्भातील आवश्यक कागदपत्रांची पडताळणी केली जात आहे.
पोलादपूर पोलीस ठाण्याचे सहाय्यक पोलीस निरीक्षक आनंद रावडे यांच्या मार्गदर्शनाखाली ठाणे अंमलदार अनुज शिंदे हे या प्रकरणाचा अधिक तपास करीत आहेत. दरम्यान, या घटनेमुळे परिसरात खळबळ उडाली असून, गुरांच्या वाहतुकीमागील नेमके कारण, संबंधित व्यक्तींची भूमिका तसेच वाहतुकीची कायदेशीरता याबाबत पोलिसांकडून सखोल तपास सुरू आहे. पोलिसांच्या पुढील तपासानंतर अधिक माहिती समोर येण्याची शक्यता आहे.