विक्रम बाबर
पनवेल : नवी मुंबईतील कामोठे परिसरात बिलाच्या वादातून एका तरुणाने हॉटेलमध्ये घुसून तलवारीने हल्ला केल्याची धक्कादायक घटना घडली आहे. या हल्ल्यात हॉटेल मॅनेजर उमेश शेट्टी जखमी झाले असून संपूर्ण घटना सीसीटीव्ही कॅमेऱ्यात कैद झाली आहे. या प्रकारामुळे कामोठे परिसरात भीतीचे वातावरण निर्माण झाले आहे.
मिळालेल्या माहितीनुसार, कामोठे सेक्टर-६ येथील एका हॉटेलमध्ये मंगळवारी रात्री सुमारे सव्वा आठच्या सुमारास ही घटना घडली. संबंधित तरुण अचानक तलवार घेऊन हॉटेलमध्ये घुसला आणि त्याने थेट हॉटेल मॅनेजर उमेश शेट्टी यांच्यावर हल्ला चढवला. आरोपीने शेट्टी यांच्या छातीवर वार केल्याचे सांगितले जात आहे. त्यानंतर त्याने हॉटेलच्या काउंटरवरही ताबडतोब हल्ला केला.
हा प्रकार इतका अचानक घडला की हॉटेलमधील ग्राहक आणि कर्मचाऱ्यांमध्ये एकच गोंधळ उडाला. जीव वाचवण्यासाठी अनेकांनी हॉटेलबाहेर धाव घेतली. काही क्षणांसाठी परिसरात भीती आणि तणावाचे वातावरण निर्माण झाले होते. या हल्ल्यामुळे हॉटेलमधील नागरिकांमध्ये मोठी दहशत पसरली.
प्राथमिक माहितीनुसार, एक दिवस आधी हॉटेलच्या बिलाच्या कारणावरून झालेल्या वादाचा बदला घेण्यासाठी आरोपीने हा हल्ला केल्याचा संशय व्यक्त केला जात आहे. घटनेनंतर आरोपी घटनास्थळावरून फरार झाला असून पोलिसांनी त्याचा शोध सुरू केला आहे.
दरम्यान, संपूर्ण घटना हॉटेलमधील सीसीटीव्ही कॅमेऱ्यात स्पष्टपणे कैद झाली आहे. या फुटेजच्या आधारे पोलिस तपास करत असून आरोपीची ओळख पटविणे आणि त्याला ताब्यात घेण्यासाठी हालचाली सुरू आहेत. जखमी मॅनेजरवर उपचार करण्यात येत असून त्यांच्या प्रकृतीबाबत अधिक माहिती अद्याप समोर आलेली नाही. कामोठे परिसरात भरवस्तीत घडलेल्या या प्रकारामुळे नागरिकांमध्ये संताप व्यक्त होत असून हॉटेल आणि सार्वजनिक ठिकाणांच्या सुरक्षेचा प्रश्न पुन्हा ऐरणीवर आला आहे.