सापाने अडवले नेरळकरांचे पाणी ; ग्रामस्थ भयभीत

नेरळ : नेरळ ग्रामपंचायतीच्या कारभाराने नेरळकर अगोदरच कंटाळले आहेत. त्यात आता ग्रामपंचायत हद्दीतील एका नागरिकाच्या पाण्याच्या पाईपलाईन मधून पाणी येत नव्हते. पाण्याच्या समस्येने हैराण या नागरिकाने खाजगी प्लम्बरकडून पाणी का येत नाही याचा शोध घेतला असता पाईपलाईनमधून चक्क 3 फुटी मृत साप आढळून आला आहे. दरम्यान या घटनेमुळे परिसरात नागरिक भयभीत झाले असून साप पाईपलाईनमध्ये आला कसा? असा प्रश्न निर्माण झाला आहे. तर या प्रकाराबाबत नेरळ ग्रामपंचायत अनभिज्ञ असल्याचे दिसून आले आहे.

मिळालेल्या माहितीनुसार नेरळ गावातील स्टेशन आळी परिसरातील तबरेज नझे यांच्या घरात गेले दोन दिवस पाणी येत नव्हते. त्यामुळे नझे कुटुंब हे पाण्याच्या समस्येमुळे हैराण झाले होते. नेरळ ग्रामपंचायतमधील पाणी विभागाचे कर्मचारी यांना सांगून देखील ते समस्या सोडवायला आलेच नाहीत. त्यामुळे खाजगी कर्मचारी घेऊन त्यांनी पाण्याचा प्रश्न सोडवण्याचा निर्णय घेतला. पाईपलाईन मधून कुठे गळती होते का याची चाचपणी करण्यात आली. मात्र कुठेही पाईपलाईन फुटली असल्याचे आढळले नाही. शेवटी जलवाहिनी उघडून बघण्याचा निर्णय खाजगी कर्मचारी यांनी घेतला. तेव्हा पाण्याच्या वोल्वजवळ सुमारे अडीच ते 3 फुटी मृत साप त्या जलवाहिनीमध्ये अडकून पडल्याचे निदर्शात आले. त्या सापामुळे ग्रामस्थांचे पाणी अडले होते.