जयंत धुळप
रायगड : कोकण किनारपट्टीतील मुरुड-जंजिरा समुद्रकिनारी यंदा नियोजित वेळी म्हणजे ऑक्टोबर महिन्यात सैबेरियांतून येणारे स्थलांतरित सीगल पक्ष्यांचे मोठ्या प्रमाणात आगमन झाले असून, पक्षी अभ्यासकांबरोबर दिवाळी सुट्टीच्या निमित्ताने किनारी भागात आलेले पर्यटकदेखील सुखावून गेले आहेत. दरम्यान, दिवाळीच्या फटाक्यांच्या आवाजांमुळे हे सीगल किनार्यावरून समुद्रात जात असल्याचे दिसून येत आहे.
सीगल पक्ष्यांचे आगमन दरवर्षी ऑक्टोबर ते मार्च या काळात कोकणच्या किनारपट्टीच्या भागात होते. सीगल पक्षी थंड हवामानामुळे युरोपातून हजारो किलोमीटरचा प्रवास करून स्थलांतर करतात आणि त्यांच्या सोयीनुसार आणि अन्नाच्या उपलब्धतेनुसार इथे मुक्काम करतात. ऑक्टोबर ते मार्च या काळात, थंडीच्या हंगामात सीगल पक्षी स्थलांतर करून येतात. पावसाळ्यानंतर थंडीच्या काळात खाद्य आणि राहण्यासाठी अनुकूल वातावरण कोकण किनारपट्टीत अनेक ठिकाणच्या पाणथळ जागी उपलब्ध होत असल्याने हे पक्षी स्थलांतर करून येथे विसावतात. छोटे मासे, किडे आणि शिंपल्यातील जीव हे त्यांचे अन्न असते.
सीगल पक्ष्यांचे थवे किनार्याजवळ उडताना पाहणे हे पर्यटकांसाठी एक खास आकर्षण ठरते. थंडीची चाहूल लागताच कोकणातील खाडी किनारे व पाणथळ जागांवर स्थलांतरित पक्षी डेरेदाखल होत असतात. त्यामुळे पर्यटकांना एक मोठी नेत्र सुखद पर्वणी मिळत असते. दरवर्षी पक्षीमित्रांना आणि पर्यटकांना पाहुण्या पक्ष्यांच्या आगमनाची उत्सुकता असते. सीगल पक्ष्यांच्या थव्यांची छायाचित्रे आपल्या कॅमेर्यात टिपण्याचा आनंद पर्यटक सध्या मुरुड समुद्रकिनारी घेत आहेत.