रायगड ः जयंत धुळप
रायगड जिल्ह्यातील कोलाड रेल्वे स्थानक ते गोवा राज्यातील वेर्णा व कर्नाटक राज्यातील सुरखकल दरम्यानच्या कोकण रेल्वे मार्गावर सुरु असलेल्या या रो-रो सेवेच्या माध्यमातून गतवर्षभरात तब्बल 10 हजार 860 मालट्रक्सची वाहतूक करण्यात आली असून ही आर्थिक उलाढाल 27 कोटी रुपयांची झाली आहे.
दरम्यान 5 नोव्हेंबर पासून या रो-रो सेवेच्या वॅगन्सची मालवाहतूक क्षमता वाढवण्यात येत असल्याने आता मालवाहतूकीत वाढ होणार असल्याची माहिती मुख्य जनसम्पर्क अधिकारी सुनील बी. नारकर यांनी दिली आहे.
जानेवारी 1999 मध्ये सुरू करण्यात आलेली कोकण रेल्वेची रोल-ऑन रोल-ऑफ (रो-रो) सेवा ही एक अद्वितीय आणि किफायतशीर मालवाहतूक सेवा ठरली आहे. लोडेड ट्रक थेट रेल्वे वॅगनवर वाहून नेण्यात येत असल्याने टॅक इंधनाची मोठी बचत, कार्बन उत्सर्जनात मोठी घट, महामार्गांवरील मालवाहू अवजड श्रेणीतील ट्रक्सची गर्दी कमी करण्यात यश आणि ट्रक चालकांचा थकवा दूर करण्यात मोठे यश साध्य करण्यात आले आहे.
कोकण रेल्वे मार्गावर चालवल्या जाणाऱ्या या रो-रो सेवा ही आव्हानात्मक पश्चिम घाटाच्या भूभागातून ट्रक वाहतुकीसाठी एक अखंड आणि कार्यक्षम मालवाहतूक (लॉजिस्टिक्स) पर्याय उपलब्ध करुन देण्यात यशस्वी ठरली आहे.
बीआरएन वॅगन्स आणि बीओएक्स वॅगन
आता पर्यंत कोकण रेल्वेने रो-रो वॅगनची माल वहन क्षमता 50 टन होती, ती वाढवून आता 57 टन करण्यात आली आहे. 57 टनांपर्यंतचे ट्रक वाहून नेण्यास सक्षम 15 बीआरएन वॅगन्स असतील. बीआरएन वॅगन्स म्हणजे सामान्यतः दोन किंवा अधिक बोगीवर आधारित असलेले मालवाहू डबे असतात. 50 टनांपर्यंतचे ट्रक वाहून नेण्यास सक्षम असलेल्या 35 बीओएक्स वॅगन ही एक प्रकारची उघडी मालवाहू वॅगन आहे, जी प्रामुख्याने कोळसा, लोहखनिज, चुनखडी आणि इतर मोठ्या प्रमाणात वाहून नेण्यासाठी वापरली जाते.