वारजे; पुढारी वृत्तसेवा: उत्तमनगर अहिरे गेट येथील भिकोबा मोरे नगर येथे एका बांधकाम व्यावसायिकावर वर्गणी मागण्याच्या कारणावरून झालेल्या वादातून जीवघेणा हल्ला करण्यात आला असल्याची गंभीर घटना समोर आली आहे. त्यामुळे परिसरात एकच खळबळ उडाली असून, दहशतीचे वातावरण निर्माण झाले आहे. चंद्रकांत रामचंद्र मोरे (वय 44 वर्षे) रा. प्रचिती अपार्टमेंट, फ्लॅट नंबर 4, कीर्तीनगर वडगाव पुणे असे त्या हल्ल्यात जखमी झालेल्या व्यवसायिकाचे नाव आहे. मोरे यांची प्रकृती गंभीर असून त्यांच्यावर सध्या रुग्णालयात उपचार सुरू असल्याचे पोलिसांनी सांगितले.
या प्रकरणी जीवन सुरेश पवार (वय वर्षे 20) रा. भिकोबा मोरे चाळ, सद्गुरू कृपा हाईट्स उत्तमनगर व त्याच्या एका अल्पवीयन साथीदाराला उत्तमनगर पोलिसांनी ताब्यात घेतले आहे. ही घटना गुरुवारी सकाळी दहा वाजताच्या सुमारास घडली आहे. पोलिसांनी दिलेल्या माहितीनुसार, भिकोबा मोरे नगर, मोरे एम्पायर बिल्डींग मध्ये मोरया रेसीडेन्सी म्हणून फिर्यादी यांचे कार्यालय आहे. त्याठिकाणी 30 ऑगस्ट रोजी गणेश उत्सवाच्या वर्गणीसाठी आरोपी जीवन आणि त्याचा साथीदार गेले असता वर्गणी मागण्यावरून त्यांच्यात वाद झाला होता.
दरम्यान गुरुवारी सकाळी 10 वाजता फिर्यादी मोरे यांच्या मोरया रेसिडेन्सी मधील ऑफिसमध्ये घुसून त्यांच्या डोक्यात कुर्हाड तसेच दगडाने गंभीर घाव घालून त्यांना जीवे मारण्याचा प्रयत्न आरोपींनी केला. घटनेमध्ये मोरे हे गंभीर जखमी झाले असून त्यांच्यावर खाजगी रुग्णालयात उपचार सुरू आहेत. दरम्यान मोरे यांच्यावर हवेली पोलिसठाण्याच्या हद्दित 2016 मध्ये गोळीबार झाला असल्याचे देखील पोलिसांनी सांगितले.
घटनेची माहिती मिळताच सहाय्यक पोलिस आयुक्त रुक्मिणी गलांडे , उत्तमनगर पोलिस ठाण्याचे वरीष्ठ पोलिस निरीक्षक सुनील जैतापूरकर, पोलिस निरीक्षक अर्जुन बोत्रे , पोलिस उपनिरीक्षक सुरेश जायभाय, पोलिस उपनिरीक्षक गणेश माने हे घटनास्थळी दाखल होऊन दोन्ही आरोपींना ताब्यात घेतले असून आहे. पुढील तपास पोलिस निरीक्षक अर्जुन बोत्रे करत आहेत.