पुणे : पुढारी वृत्तसेवा: स्वारगेट स्थानकातील एसटी गाड्यांच्या पार्किंगसाठीच्या जागेचा प्रश्न लवकरच संपणार आहे. स्थानकालगतच असलेली वर्कशॉप कॉलनीतील दीड एकर जागा एसटी प्रशासन स्थानकात ये-जा करणार्या गाड्या उभ्या करण्यासाठी उपलब्ध करून देणार आहे. स्वारगेट स्थानकात दररोज 2 हजार 600 एसटी गाड्यांची ये-जा असते. सणासुदीच्या काळात तर येथे पाय ठेवायलासुद्धा जागा नसते.
या संदर्भात सविस्तर माहिती देणारे 'एसटी स्थानक गाड्यांसाठी अपुरे' असा सचित्र मथळा असलेले वृत्त मंगळवारी प्रसिद्ध करण्यात आले होते. त्याची दखल घेत एसटी प्रशासनाने येथील गाड्यांची गर्दी कमी करण्यासाठी प्रशासनाच्या ताब्यात असलेली दीड एकर जागा स्वारगेट स्थानकाला जोडण्याचा निर्णय घेतला आहे.
पूर्वीपेक्षा जास्त गाड्या उभ्या राहणार
स्वारगेट स्थानकाला लागूनच एसटीच्या वर्कशॉप कॉलनीची जागा आहे. ही जागा गेल्या अनेक दिवसांपासून पडून आहे. ती जागा वापरण्यायोग्य करून तिचा स्वारगेट स्थानकात समावेश केला जाणार आहे. त्यामुळे आता पुर्वीपेक्षा अधिक गाड्या स्वारगेट स्थानकात उभ्या करता येणार आहेत.
स्थानकात आषाढी एकादशीला होणार गर्दी
राज्यभरातून पंढरपूर येथील आषाढी एकादशीला साडेचार हजार एसटीच्या गाड्या सोडण्यात येणार आहेत. त्यातील बहुतांश गाड्यांची ये-जा स्वारगेट स्थानकात असणार आहे. त्यामुळे येत्या आषाढी एकादशीनिमित्त स्वारगेट स्थानकात गाड्यांची प्रचंड गर्दी होणार आहे. त्यामुळे एसटी प्रशासनाला तातडीने गाड्यांचे नियोजन आणि जागा वाढविण्याची गरज भासणार आहे. त्या पार्श्वभूमीवर एसटी प्रशासनाकडून कार्यवाही सुरू करण्यात आली आहे.
स्वारगेट स्थानकाची एकूण जागा – 8 एकर
वर्कशॉप कॉलनीची मिळणारी जागा – दीड एकर
सध्या गाड्यांच्या पार्किंगसाठीच्या वापरातील जागा – 6 एकर
उर्वरित दोन एकरमध्ये – मेंन्टनन्स डेपो, कार्यालये, पेट्रोलपंप, दुचाकी पार्किंग
स्वारगेट स्थानकात ये-जा करणार्या गाड्या – 2 हजार 600
स्वारगेट स्थानकात राज्यातील विविध जिल्ह्यांमधून एसटीच्या गाड्या येत असतात. त्यामुळे येथे गाड्यांची गर्दी होत असते. आम्ही येथे लागूनच असलेली वर्कशॉप कॉलनीतील दीड एकर जागा गाड्या उभ्या करण्यासाठी वापरणार आहोत. जेणेकरून स्थानकातील गाड्यांची गर्दी कमी होण्यास मदत होईल.
– ज्ञानेश्वर रणावरे, विभागीय वाहतूक व्यवस्थापक, एसटी, पुणे विभाग