भोर; पुढारी वृत्तसेवा: भोर- कापूरव्होळ रोडवरील खंडोबा माळजवळील नेकलेस पॉइंटजवळ रात्री वाह-चालकांना बिबट्याचे दर्शन घडल्यामुळे नागरिकांमध्ये घबराटीचे वातावरण आहे. तालुक्यात मागील सहा महिन्यांपूर्वी विसगाव, चाळीसगाव खोरे, हिरडस मावळ तसेच वेळवंड खोर्यात अनेक ठिकाणी बिबट्या दिसला होता. काही ठिकाणी शेळी, कुत्रे तसेच गाईही मारल्या होत्या. यानंतर सहा महिने बिबट्या तालुक्यात दिसलाच नव्हता. मात्र गुरुवारी (दि.25) भोर- कापूरव्होळ मार्गावरील खंडोबा माळावरील नेकलेस पॉइंटजवळ रात्रीच्या वेळी वाहनचालकांना बिबट्या रस्त्यावरच दिसल्याने वाहनचालक, परिसरातील नागरिक व शेतकरी घाबरून गेले आहेत.
नेकलेस पॉइंटजवळील रस्त्याच्या दुतर्फा असणारी झाडा-झुडपांमध्ये प्राणी रात्रीच्या वेळी लपून बसतात. संबंधित विभागाने ही झाडे-झुडपे तोडावी, अशी मागणी होत आहे. वाहनचालकांनी रात्री अपरात्री कामावर ये-जा करताना सावधगिरीने वाहन चालवावे तसेच वाहतुकीच्या मार्गावर हिंस्र प्राणी दिसल्यास वनविभागाला कळवावे, असे आवाहन अरुण डाळ, वनपरिमंडल अधिकारी (नसरापूर – भोर) यांनी केले आहे.
दुचाकी वाहनचालक बचावला
गुरुवारी (दि.25) रात्रीच्या वेळी कामावरून सुटून घरी जात असताना एका वृद्ध वाहनचालकाच्या समोरच नेकलेस पॉईंटजवळ बिबट्या काही अंतरावर येऊन उभा राहून झाडा-झुडपांमध्ये निघून गेला. नशीब बलवत्तर म्हणून यातून हे आजोबा बचावल्याचे वाहनचालक संतोष खंडाळे यांनी सांगितले.