बारामती : पुढारी वृत्तसेवा : हजेरीपत्रक, पगारपत्रक, सेवापुस्तकामध्ये खोट्या व बनावट नोंदीचे कागदपत्र तयार करून तसेच बनावट नियुक्तीपत्राद्वारे नोकरी व संगनमताने फसवणूक केल्याप्रकरणी चौघांविरोधात वडगाव निंबाळकर पोलिस ठाण्यात गुन्हा दाखल करण्यात आला आहे. न्यायालयाने याप्रकरणी गुन्हा दाखल करून अहवाल सादर करण्याचे आदेश पोलिसांना दिले होते.
पोलिसांनी दिलेल्या माहितीनुसार, संदीप हनुमंत गाडेकर (रा. चोपडज, ता. बारामती) यांनी याबाबत फिर्याद दिली. रामचंद्र नारायण भंडलकर (वय ६१, रा. चोपडज), पुष्पलता बाळासाहेब जगताप, रमेश विठ्ठल भोसले (रा. कानाडवाडी, ता. बारामती) व एक अज्ञात इसमावर गुन्हा दाखल झाला आहे. १८ फेब्रुवारी १९९७ ते ११ जुलै २०२२ या कालावधीत न्यू इंग्लिश स्कूल, पांढरवस्ती, चोपडज (ता. बारामती) येथे हा प्रकार उघडकीस आला आहे. यातील भंडलकर व भोसले हे संस्थेतून निवृत्त झाले आहेत. आरोपींनी १८ फेब्रुवारी १९९७ ते २५ एप्रिल १९९७ या कालखंडामध्ये या शाळेत नोकरी केलेली नसताना हजेरीपत्रक, पगारपत्रक, सेवापुस्तकामध्ये खोट्या व बनावट नोंदी तयार करून शासनाची फसवणूक करून एकाच वेळी दोन ठिकाणाहून पगार घेतला.
२५ एप्रिल १९९७ नंतर दिसले याची यशवंतराव चव्हाण शिक्षण प्रसारक मंडळ, कानाडवाडी या संस्थेची नियुक्ती नसताना शिक्षणाधिकारी (माध्यमिक) यांची कोणतीही मान्यता नसताना शासनाची फसवणूक करत आजअखेर बोगस नोकरी करत पगार मिळविला. त्यांनी फिर्यादी व विद्यार्थ्यांचा विश्वासघात केल्याचा दावा फिर्यादीने न्यायालयात दाखल केला होता. बारामती न्यायालयाने याप्रकरणी गुन्हा दाखल करण्याचा आदेश दिले आहेत.
हेही वाचा