पुणे; पुढारी वृत्तसेवा: मेट्रोचे काम, पावसाने रस्त्याला पडलेले खड्डे, यामुळे शहरात वाहतूक कोंडी होत आहे. त्या पार्श्वभूमीवर उच्च व तंत्रशिक्षणमंत्री चंद्रकांत पाटील यांनी शनिवारी (दि. 27) पोलिस आयुक्तालयात बैठक घेऊन वाहतूक कोंडीवर मात करण्यासाठी नियोजन करण्याची सूचना केली. या वेळी वाहतूक विभागाकडून ते करत असलेल्या उपाययोजनांचे सादरीकरण करण्यात आले. या वेळी आमदार भीमराव तापकीर, महापालिका आयुक्त विक्रम कुमार, पोलिस आयुक्त अमिताभ गुप्ता, पोलिस सहआयुक्त संदीप कर्णिक, महापालिकेचे अतिरिक्त आयुक्त डॉ. कुणाल खेमनार, वाहतूक विभागाचे पोलिस उपायुक्त राहुल श्रीरामे, 'पीएमआरडीए'चे विवेक खरवडकर आदी उपस्थित होते.
पुणे शहरात दिवसेंदिवस लोकसंख्येमध्ये वाढ होत आहे. वाढत्या लोकसंख्येचा विचार करता शहरातील वाहतूक कोंडी कमी करण्यासाठी पुणे महामेट्रो, महानगरपालिका, पीएमआरडीए, कटक मंडळ मिळून आराखडा तयार करण्याचे निर्देश पाटील यांनी दिले. पाटील म्हणाले, 'शहरात सावित्रीबाई फुले पुणे विद्यापीठ चौक, चांदणी चौक, वाघोली रस्ता, नवले पूल या ठिकाणी होणारी वाहतूक कोंडी कमी करण्यासाठी वाहतूक पोलिस विभागातील अधिकारी व कर्मचार्यांनी नियोजन करावे. आवश्यकतेनुसार बाह्य संस्थेकडून प्रशिक्षित मनुष्यबळाची नेमणूक करावी.' गणेशोत्सव काळात भाविकांची गैरसोय टाळण्यासाठी वाहतूक कोंडीवर मात करण्याबाबत नियोजन सादर करण्याचे निर्देश त्यांनी अधिकार्यांना दिले.
चांदणी चौकातील वाहतूक कोंडीच्या अनुषंगाने फिरून पाहणी करण्यात आली. कोंडी सोडवण्यासाठी कोणकोणत्या उपाययोजना करता येतील याबाबत चर्चा करण्यात आली. वाहतूक नियमनासाठी पन्नास-पन्नास ट्रॅफिक वॉर्डन देण्यात येणार आहेत. सकाळी आठ ते अकरा आणि सायंकाळी सहा ते नऊ वाजेपर्यंत महामार्गावर अवजड वाहनांना बंदी करण्यात येणार आहे.
– राहुल श्रीरामे, वाहतूक पोलिस उपायुक्त पुणे