पुणे : उतारावर उभा केलेला बंद ट्रॅक्टर अचानक सुटून झालेल्या अपघातात नऊ दुचाकींचे नुकसान झाले असून, एक महिला जखमी झाली आहे. महिलेच्या पायाला दुखापत झाली आहे. ही घटना शनिवारी (दि.16) दुपारी बिबवेवाडीतील अप्पर बसडेपो येथील उतारावर घडली आहे. याप्रकरणी बिबवेवाडी पोलिसांनी ट्रॅक्टर चालक रमेश देविदास राठोड (वय 37, रा. येवलेवाडी) याच्याविरुद्ध गुन्हा दाखल करून त्याला ताब्यात घेतले आहे.
पोलिसांनी दिलेल्या माहितीनुसार, उतारावर ट्रॅक्टर उभा करून राठोड हा जेवण करण्यासाठी गेला होता. त्यावेळी अचानक ट्रॅक्टर उतारावरून सुटला. त्याने नऊ दुचाकींना उडवले. त्यामध्ये दुचाकींचे नुकसान झाले आहे. तसेच एका महिलेलादेखील धडक दिली. त्यानंतर तेथील एका झाडाला अडकून तो थांबला. घटनेची माहिती मिळताच बिबवेवाडी पोलिसांनी घटनास्थळी धाव घेऊन, चालकाला ताब्यात घेतले.