पिंपरी; पुढारी वृत्तसेवा: पावसाळ्यात अत्यावश्यक बाब म्हणून खोदकामास परवानगी देण्यात आली होती. मात्र, खोदकामानंतर रस्त्यांची दुरुस्तीकडे दुर्लक्ष केल्याने तसेच, दुरुस्ती काम योग्य तर्हेने न केल्याने पिंपरी-चिंचवड स्मार्ट सिटी लिमिटेडने लॉर्सन अॅण्ड टुब्री (एल अॅण्ड टी) या ठेकेदार कंपनीला तब्बल 8 लाख 40 हजारांचा दंड केला आहे. कारवाई होऊनही काम संथ गतीने सुरू असल्याचे धक्कादायक चित्र आहे.
शहरात स्मार्ट सिटीची विविध कामे सुरु आहेत. एल अॅण्ड टी कंपनीसोबत 25 जानेवारी 2019 ला करारनामा झाला. त्यांना वर्क ऑर्डर देण्यात आली. सिटी फायबर नेटवर्क फॉर कोअर, अॅग्रीशन अॅण्ड अॅक्सेस लेअर, वायफाय, सीसीटीव्ही, पोल बसणे अशी ठेकेदार कंपनीचे कामे आहेत. या कामासाठी रस्ता व पदपथ खोदकाम केले जात आहे. अत्यावश्यक बाब म्हणून कोअर (गाभा) व अॅग्रीशनसाठी (एकत्रीकरण) करण्यात येणार्या रस्ता खोदाईस पावसाळ्यातही परवानगी आयुक्त तथा प्रशासक राजेश पाटील यांनी दिली आहे.
या कामांतर्गत शहरामध्ये सुरू असलेल्या खोदकामाची क्षेत्रीय कार्यालयांच्या वतीने वारंवार पाहणी करण्यात आली. त्यावेळी अटी व शर्तीनुसार काम करण्यात येत नसल्याचे आढळून आले. तसेच, खोदकाम केल्यानंतर रस्ता व्यवस्थित न बुजवणे, त्याची वेळेत दुरुस्ती न करणे अशा बाबी समोर आल्या आहेत. दोषी आढळल्याने एल अॅण्ड टी या ठेकेदार कंपनीला मोठा दंड करण्यात आला आहे.
सन 2022-21 या वर्षी 5 लाख, सन 2021-22 या वर्षी 3 लाख आणि चालू वर्षात 40 हजार रुपयांचा असा एकूण 8 लाख 40 हजारांचा दंड करण्यात आला आहे. तसेच, सक्त समज देण्यात आली आहे. दंडात्मक कारवाई ठेकेदारांच्या कामात सुधारणा झालेली नाही. कामे संथ गतीने सुरू असून, अनेक ठिकाणी अटी व निमयांचे भंग केले जात आहे, अशा नागरिकांच्या तक्रारी आहेत.
कामे वेळेत करण्याच्या ठेकेदाराला सक्त सूचना
खोदकाम करून वेळेत रस्ता न बुजवणे. निविदेतील अटी व शर्तींचा भंग केल्यामुळे एल अॅण्ड टी या ठेकेदार कंपनीवर वेळोवेळी दंडात्मक कारवाई करण्यात आली आहे. यावर्षी कंपनीला 40 हजारांचा दंड केला आहे. नागरिक व वाहनचालकांच्या सुरक्षेकडे लक्ष ठेऊन कामे वेळेत पूर्ण करण्याचा सक्त सूचना दिल्या आहेत, असे स्मार्ट सिटीचे कार्यकारी अभियंता मनोज सेठीया यांनी सांगितले.