पिंपरी : पिंपरी-चिंचवड तसेच आसपासच्या ग्रामीण भागातील रुग्णांसाठी महत्त्वाचे असलेल्या महापालिकेच्या यशवंतराव चव्हाण स्मृती रुग्णालयातील सोयी-सुविधा आणि वैद्यकीय सेवेबाबत रुग्ण व त्यांच्या नातेवाईकांच्या तक्रारी वाढत आहेत. ही बाब श्रीमंत म्हणून गणल्या जाणार्या पिंपरी-चिंचवड महापालिकेला शोभणारी नाही, असे मत आमदार लक्ष्मण जगताप यांनी व्यक्त केले. रुग्णालयात रुग्णांसाठी चांगल्या मूलभूत सुविधा, दर्जेदार वैद्यकीय उपचार, सर्व आजारांवरील औषधे, आवश्यक डॉक्टर्स व इतर वैद्यकीय कर्मचारी उपलब्ध करून देण्यासाठी तातडीने कार्यवाही करण्यात यावी. तसेच, यासंदर्भात अधिकारी आणि लोकप्रतिनिधींची बैठक घेण्यात यावी, अशा सूचना आमदार जगताप यांनी आयुक्त राजेश पाटील यांना केल्या आहेत.
यासंदर्भात आमदार जगताप यांनी आयुक्त पाटील यांना निवेदन दिले आहे. निवेदनात त्यांनी म्हटले आहे, की वायसीएम रुग्णालयाबाबत रुग्ण, त्यांचे नातेवाईक तसेच विविध सामाजिक संघटनांच्या तक्रारी वाढत आहेत. रुग्णालयातील पुरेशा वैद्यकीय सुविधांचा तसेच अपुरे मनुष्यबळ त्यासाठी कारणीभूत ठरत आहे. रुग्णालयात डॉक्टरांना लागणारे वैद्यकीय साहित्य तसेच आधुनिक वैद्यकीय साधने उपलब्ध नाहीत. रुग्णांवर रात्रीच्या वेळी शस्त्रक्रिया करण्यासाठी सुविधेचा अभाव आहे. उपचारासाठी येणार्या रुग्णाला वेगवेगळ्या ठिकाणी रांगेत उभे राहावे लागते. त्यामुळे प्रत्यक्ष उपचारासाठी दोन ते तीन तासांचा अवधी लागत आहे.
नवीन केसपेपर, औषधे घेणे, वैद्यकीय बिले भरण्यासाठी रुग्ण संख्येच्या तुलनेत काऊंटर अपुरे पडत आहेत. रुग्णांना हेल्थ कार्ड वाटप बंद करण्यात आले आहे. शस्त्रक्रिया विभागातील अपुर्या सुविधा व कर्मचार्यामुळे गोरगरीब रुग्णांना शस्त्रक्रियेसाठी दोन ते तीन महिने प्रतीक्षा करावी लागत आहे. अतिदक्षता विभागात दाखल होण्यासाठी रुग्णांना अनेक अडचणींना सामोरे जावे लागत आहे. परिणामी यशवंतराव चव्हाण स्मृती रुग्णालयात येणारे रुग्ण आणि नातेवाईक त्रस्त होत आहेत. रुग्णालयात चांगल्या मुलभूत सुविधा, वैद्यकीय सेवा, आवश्यक डॉक्टर्स व कर्मचारी उपलब्ध करून देण्यासाठी प्रशासनाने तातडीने कार्यवाही करावी. त्याचप्रमाणे यासंदर्भात लोकप्रतिनिधी आणि वैद्यकीय विभागाच्या अधिकार्यांची एक बैठक आयोजित करावी.