घटस्थापनेसाठी दुपारी पावणे दोनपर्यंतचा मुहूर्त

पुणे; पुढारी वृत्तसेवा : सोमवारपासून (दि. 26) नवरात्रोत्सवाला जल्लोषात सुरुवात होत असून, घटस्थापनेसाठी सोमवारी ब्राह्म मुहूर्तापासून, म्हणजे पहाटे पाच वाजल्यापासून दुपारी पावणेदोन वाजेपर्यंत घटस्थापना करून पूजन करता येईल.

नवरात्रोत्सवामध्ये शुक्रवारी (दि. 30) ललिता पंचमी आहे. 2 ऑक्टोबर रोजी महालक्ष्मी पूजन असून, त्या दिवशी घागरी फुंकण्याचा कार्यक्रम करण्यात येणार आहे. 3 ऑक्टोबर रोजी महाष्टमीचा उपवास करावयाचा आहे. 4 ऑक्टोबर रोजी नवरात्रोत्थापन म्हणजेच नवरात्र समाप्ती असून, 5 ऑक्टोबर रोजी विजयादशमी (दसरा) आहे, अशी माहिती 'दाते पंचांग'चे मोहन दाते यांनी दिली. दाते म्हणाले, काही कारणांमुळे ज्यांना 26 सप्टेंबर रोजी घटस्थापना करणे शक्य होणार नाही, त्यांनी 28 सप्टेंबर, 30 सप्टेंबर किंवा 3 ऑक्टोबर यापैकी कोणत्याही दिवशी घटस्थापना करावी आणि 4 ऑक्टोबर रोजी नवरात्रोत्थापन करावे. सर्वसाधारणपणे नवरात्रोत्थापन आणि दसरा एकाच दिवशी येतात. मात्र, यंदा दसर्‍याच्या आदल्या दिवशी नवरात्रोत्थापन आहे. घटस्थापनेपासून दसर्‍यापर्यंत नऊ किंवा दहा दिवसांचा कालावधी असतो. तिथीच्या क्षय-वृद्धीमुळे असा फरक असतो. यावर्षी घटस्थापनेपासून नवव्या दिवशी नवरात्रोत्थापन असून, दसरा दहाव्या दिवशी आहे.

नवरात्रोत्सवातील महत्त्वाचे दिवस…

26 सप्टेंबर : घटस्थापना
30 सप्टेंबर : ललिता पंचमी
2 ऑक्टोबर : महालक्ष्मी पूजन (घागरी फुंकणे)
3 ऑक्टोबर : दुर्गाष्टमी, महाष्टमी उपवास
4 ऑक्टोबर : नवरात्रोत्थापना
5 ऑक्टोबर : विजयादशमी (दसरा)

महालक्ष्मी पूजन (घागरी फुंकणे) या दिवशी मध्यरात्री अष्टमी तिथीवर देवीचे पूजन करण्याची प्रथा आहे. अशी अष्टमी 2 ऑक्टोबर रोजी मध्यरात्री आहे. त्यामुळे त्या दिवशी महालक्ष्मी पूजन दिलेले आहे. मात्र, दुर्गाष्टमी 3 ऑक्टोबर रोजी आहे. विजयादशमी म्हणजेच दसरा हा दिवस अत्यंत शुभ मानला जातो. या दिवशी विजय मुहूर्तावर अनेक जण आपल्या नवीन उपक्रमाची सुरुवात करतात. हा विजय मुहूर्त महाराष्ट्रामध्ये दुपारी 2 वाजून 26 मिनिटे ते 3 वाजून 31 मिनिटे या कालावधीत आहे.

– मोहन दाते, दाते पंचांगकत