पुणे : मित्रासोबत गप्पा मारत थांबलेला असताना हॉस्टेलमधील मुलींची छेड काढल्याच्या संशयावरून हॉस्टेलचालक आणि त्याच्या सुनेने एका व्यक्तीला मारहाण केली. या वेळी सुनेने संबंधित व्यक्तीच्या कानाचा चावा एवढ्या जोरात घेतला की त्याच्या कानावर पाच टाके घालावे लागले. याबाबत मिलिंद वसंत कोठारी (वय 40, रा. दत्त वसाहत, दक्षिणमुखी मारुती मंदिरासमोर, शिरोळे रोड, शिवाजीनगर) यांनी डेक्कन पोलिस ठाण्यात फिर्याद दिली आहे. त्यावरून पोलिसांनी सुरेश विठ्ठल कांबळे (वय 60, रा. शुक्रवार पेठ) आणि त्यांच्या सुनेवर गुन्हा दाखल केला आहे.
पोलिसांनी दिलेल्या माहितीनुसार, फिर्यादी मिलिंद कोठारी हे ड्रायव्हर म्हणून नोकरी करतात. सोमवारी दुपारी ते जेवण करुन घराबाहेर मित्रांसोबत गप्पा मारत होते. त्यावेळी तेथे होस्टेल चालविणारे सुरेश विठ्ठल कांबळे व त्यांची सुन आले. कांबळे यांनी तुम्ही मुलींना का छेडता असे म्हणून फिर्यादी कोठारी यांच्याशी भांडण सुरू केले. तेव्हा आम्ही कोणालाही छेडत नाही. आम्ही गप्पा मारत उभे आहोत, असे कोठारी म्हणाले. मात्र, त्यानंतर कोठारी आणि त्यांच्या सुनेने कांबळे यांना मारण्यास सुरुवात केली. त्या झटापटीत त्यांच्या सुनेने कांबळे यांच्या उजव्या कानाचा जोरात चावा घेतला. पोटावरही दोन ठिकाणी कटरसारख्या धारदार हत्याराने वार केले. हा प्रकार घडल्यानंतर, कोठारी यांना ससून रुग्णालयात दाखल करण्यात आले असून त्यांच्या कानाला पाच टाके घालण्यात आले. तर, पोटावर दोन्ही ठिकाणी दोन-दोन टाके घालावे लागले. डेक्कन पोलिसांनी ससून रुग्णालयात जाऊन त्यांची फिर्याद घेतली असून पोलीस उपनिरीक्षक प्रविण कुलकर्णी तपास करीत आहेत. दरम्यान मारहाणीचा एक व्हिडिओ देखील व्हायरल झाला आहे.