पुणे: शहराच्या मध्यवस्तीमध्ये एका ठिकाणी भांगेच्या गोळ्या विकणाऱ्या महिलेला खडक पोलिसांनी ताब्यात घेतले. तिच्याकडे केलेल्या चौकशीत गंज पेठेतील एका खोलीत ती भांगेच्या गोळ्या तयार करण्याचा चक्क कारखाना चालवत असल्याचे आढळून आले. तिच्याकडून यंत्रसामग्री, भांगेच्या गोळ्या तयार करण्याचे साहित्य असा एक लाख 21 हजार 270 रुपयांचा माल जप्त केला आहे. रोहिणी सुरेश चव्हाण (वय 52, रा. गंज पेठ) असे ताब्यात घेतलेल्या महिलेचे नाव आहे.
पोलिसांनी दिलेल्या माहितीनुसार, पोलिस अंमलदार आशिष चव्हाण यांना गंज पेठ येथे एक महिला भांगेच्या गोळ्यांची विक्री करीत असल्याची माहिती मिळाली. वरिष्ठ पोलिस निरीक्षक शशिकांत चव्हाण यांना याची माहिती दिल्यानंतर सहायक पोलिस निरीक्षक अनिता तोंडे, अर्जुन कुदळे, पोलिस उपनिरीक्षक महेंद्र कांबळे, पोलिस हवालदार तांबोळी, पोलिस अंमलदार आशिष चव्हाण, नदाफ, पठाण, गायकवाड, महिला अंमलदार रुपनवार हे पथक गंज पेठ फायर बिगेडच्या जवळ गेले. (Latest Pune News)
तेथे घरासमोरील अंगणात जिन्याजवळ एक महिला बसलेली दिसली. तिच्याकडे प्लास्टिकच्या पिशव्यांमध्ये काहीतरी असल्याचे दिसले. त्यावरून पोलिसांनी या महिलेला ताब्यात घेतले. तिच्याकडील पिशवीची तपासणी केली. त्यात भांगेच्या गोळ्या दिसून आल्या. 28 हजार रुपयांच्या 280 भांगेचे गोळे, 440 रुपये रोख मिळून आले.
सात गोण्या पावडर, मशीन, मोटार, वजनकाटे अन् बरेच काही
महिलेला ताब्यात घेतल्यानंतर भांगेचे गोळ्या कोठून आणले याबाबत विचारणा केल्यावर तिने घराच्या बाजूस एका रूममध्ये माल बनवित असल्याचे सांगितले. पोलिसांनी खोलीमध्ये प्रवेश केल्यावर तेथे भांग तयार करण्याची सात गोण्या पावडर, भांगेचे गोळे तयार करण्याचे मशीन, टेबल, मोटार, वजनकाटे, मापे, लोखंडी शेगडी, फीज असा 1 लाख 21 हजार 270 रुपयांचा माल मिळून आला.