भिगवण: यापूर्वी उजनी जलाशयात अनेक नद्या, जलाशय अगदी समुद्रातील माशांनी देखील उजनी जलाशयात दर्शन दिले होते. यामध्ये गार मासा, जितडा आदींचा समावेश आहे. शनिवारी (दि. ११) पुन्हा एकदा 'भाव' खाणारा साडेसहा किलो वजनाचा जितडा मासा उजनी जलाशयात मिळून आला असून, या माशाला तब्बल ५९५ प्रतिकिलो बाजार मिळाला.
पळसदेव येथील युवा मच्छीमार युवराज नगरे यांना उजनी जलाशयात हा जितडा मासा त्यांनी टाकलेल्या अकरा बोटी व्यासाच्या जाळ्यात अडकला होता. या माशाला त्यांनी कृषी उत्पन्न बाजार समितीच्या भिगवण येथील मासळी उपबाजारात अंबिका फिश मार्केटवर विक्रीला आणला होता. झालेल्या लिलावात बारामतीचे प्रसिद्ध व्यापारी राकेश मोरे यांनी तो ५९५ रुपये प्रतिकिलो याप्रमाणे खरेदी केला. त्यामुळे युवराज नगरे यांना एका माशाचे तब्बल ३,८६७ रुपये मिळाले.
नैसर्गिक अधिवास नाही; पण फायदेशीर मासा: डॉ. उन्मेष काटवटे
याबाबत बाॅम्बे नॅचरल हिस्ट्री सोसायटीचे वरिष्ठ शास्त्रज्ञ डॉ. उन्मेष काटवटे यांच्याशी संपर्क साधला असता ते म्हणाले की, उजनी हे जिताडा मम्चेशा नैसर्गिक अधिवास नाही. तो खाऱ्या पाण्यातील मासा असला, तरी गोड्या पाण्यात तो राहू शकतो. हा मासा उजनीसाठी फायदेशीर आहे. याचे कसलेही दुष्परिणाम नसून, या माशांची इथे पिले होत नाहीत आणि चिलापीसारख्या माशांचे प्रमाण कमी करण्यास मदत करतो. हा मासा पर्यावरणाला लाभदायक आहे; शिवाय या माशाला मागणी मोठी आहे.